Guerra: "Romanía ten moito que lle ofrecer a Galicia"

Unha das voces máis respecta­das a escala internacional no mundo da economía e, segura­mente, o maior gurú de Roma­nía, Mugur Isarescu, visita hoxe Galicia dando unha "mostra evi­dente" da importancia que este país lles dá ás relacións econó­micas coa comunidade.

Actual gobernador do Banco Central romanés, cargo que desempeña desde hai 19 anos, e ex primeiro ministro desde finais de 1999 ata decembro de 2000, Isa­rescu chega a Santiago como in­vitado estrela dun novo fo­ro organizado polo Grupo Co­rreo Gallego (desde as 10,00 horas no Hostal dos Reis Ca­tólicos) nunha cita que o conse­lleiro de Economía e Industria, Javier Guerra, que clausurará o encontro, valoraba onte como unha "operación de suma para po­der traballar unidos en potenciar o noso desenvolvemento económico, social, tecnolóxico e comercial".

Para o representante da Xunta, a presenza de Isarescu "traerá considerables melloras das nosas relacións comerciais e económicas", porque o mercado romanés "ten moito que lle ofrecer a Galicia, segundo o Instituto de Co­mercio Exterior (Icex), as cifras de exportacións superan os 45 millóns antes do peche deste exercicio, e o ano pasa­do situáronse por enriba dos 74, nunha balanza comercial que está bastante equilibrada, aínda que é necesario seguir fomen­tando iniciativas para potenciar os nosos fluxos comerciais".

Os empresarios galegos non ocultan o seu interese polo mercado estratéxico e, segundo recoñece Guerra, "son varias as empresas que manteñen relacións comer­ciais directas con Romanía, en concreto no sector da moda galega é un dos que máis ex­portan a este país; seguidos pes­cados e mariscos; tecnoloxía in­dustrial..., unha lista na que po­demos incluír moitos outros sectores que manteñen inter­cambios comerciais nun mer­cado interesante". Dúas son as razóns para afirmar isto: porque está en pleno crecemento e porque "pode actuar como nexo de unión cos seus veciños balcáni­cos ou Rusia".

Desde a Consellería, polo tanto, "non se entende a internaciona­lización como unha opción senón como unha realidade, por iso os emprendedores contan con todo o apoio da Xunta", con axudas de 1,7 millóns no Plan de Fomento das Ex­portacións.