O PP esíxelle a José Blanco explicacións polo AVE Vigo-Porto

O coordinador dos deputados galegos do PP no Congreso, Celso Delgado, solicitou a comparecencia "urxente" do ministro de Fomento, José Blanco, na Comisión de Fomento da Cámara Baixa para que informe sobre os cambios de criterio respecto do modelo de conexión de AVE entre Vigo e Oporto, así como sobre a demora nos prazos previstos.

Nun comunicado de prensa, os deputados galegos do PP explicaron onte que pretenden, ante todo, que o Goberno "garanta que modelo de AVE conectará Galicia con Portugal", xa que mentres no cumio Hispano-Luso celebrado o 24 e 25 de novembro de 2006 en Badaxoz se comprometeusa conexión ferroviaria como unha liña de tráfico mixto, "agora parece que se inclina por unha liña exclusiva de pasaxeiros".

Delgado dixo que entende que o titular de Fomento "debe clarificar" tamén "por que se hai menos dun ano o Goberno afirmaba con rotundidade que as obras entre Porriño e a Fronteira Portuguesa comezarían en 2010 e estarían rematadas en 2013 agora fala dun atraso de 24 meses".

Pola súa parte, o alcalde de Vigo Abel Caballero censurou que o PP pedise no seu día un novo trazado da entrada do AVE e criticara o atraso anunciado. O rexedor asegurou que esta modificación se solicitou durante a anterior lexislatura, co PP á fronte do concello, e cualificou de "fariseísmo político" que se culpe a Fomento da nova data.