A CEG, vixía do fondo estatal para o emprego

No que vai de ano, case 5.000 compañías galegas estanse be­neficiando do adiamento de pagamentos á Seguridade Social dentro das medidas estatais de impulso ó tecido produtivo postas en marcha polo Gober­no central. En total, déuselles o visto e prace a 4.711 solicitudes, o 98% das tramitadas. Estes son os datos propor­cionados onte polo delegado do Goberno, Antón Louro, tras reunirse en Santiago coa directiva da Confederación de Empresarios de Galicia (CEG), a quen lle propuxo a incorpo­ración da patronal galega á comisión de seguimento do novo Fondo Estatal para o Em­pleo e a Sustentabilidade Local, na que xa están a Fegamp e as organizacións sindicais.

Unha oferta ante a que o presidente desta organización, Antonio Fontenla, xa trasladou a súa disposi­ción de aceptar e, así, contribuír a que os investimentos previstos no territorio galego se fagan "o mellor e antes posible", uns 301 millóns de euros que se investirán na comunidade, dos 5.000 totais.

En roda de prensa, Louro recordou o "éxito" do Fondo Estatal de Investimento Local (FEIL) en Galicia, con 491 millóns de investimento e que permitiu crear 23.000 empregos, asegu­rando que o Executivo ten a "mesma ambición" con esta nova iniciativa que se executará en 2010. A través do novo Fondo, o Goberno "conseguiu"que se destinen a Galicia 301 millóns para que os concellos desenvolvan novos proxectos que contribuirán a dinamiza­ción da economía e xerarán máis de 12.000 empregos.

O encontro mantido onte prodúcese despois de que o delegado do Goberno en Galicia se reunise con representantes das tres organizacións sindicais da comunidade e da Fegamp, que aceptaron integrarse na citada comisión.

Así mesmo, aproveitou a reunión coa patronal para recordar a achega de recursos do Estado a Galicia, que ascenderon a case 20.000 millóns de euros en 2008, un 56% máis que en 2004. Tamén subliñou que o Goberno central lle consignou a Galicia o 8,5% do investimento nos Presupostos Xerais do Estado (PXE), 2.005 millóns, dos que 1.600 se destinarán a infraestruturas.