O PPdeG decide non apoiar a oferta de compra de Feiraco

A maioría do PPdeG impúxose onte no pleno da Cámara para rexeitar unha proposición non de lei presentada polo PSdeG -e apoiada polo BNG- que reclamaba a adopción das medidas necesarias para impulsar a adquisición, por parte das cooperativas galegas lideradas por Feiraco, da planta de Pascual en Outeiro de Rei (Lugo).

A iniciativa solicitaba tamén a participación económica e a implicación política da Consellería de Medio Rural para crear un gran grupo lácteo galego que garantiría a actividade da planta, o mantemento dos empregos e a recollida de leite ós produtores.

A autora da proposición, a socialista Sonia Verdes acudiu a un símil matrimonial para sinalar que "Pascual ten noiva e quere casar" -coas cooperativas, precisou- pero "parece que lle están preparando outro casamento". Así, apuntou os posibles proxectos de Nueva Rumasa ou La Arzuana, sinalando que opción é "impensable a non ser desde un interese partidista".

Tanto Verdes como a deputada nacionalista Tareixa Paz criticaron duramente a falta de actividade da Consellería de Medio Rural neste asunto. "O que están a facer e nada é todo o mesmo", indicou Verdes; mentres Paz lamentou que a Xunta leve "seis meses sen dicir nin chío a respecto dunha proposta empresarial desta envergadura" e só "abra as portas" para recibir o comité de empresa de Pascual cando apenas quedan dez días para que se materialice o expediente de regulación de emprego (ERE) que afecta a 135 traballadores. "Hai unha intención manifesta e reiterada de non intervir absolutamente en nada", criticou a deputada do BNG.

Galicia, a que menos contratos homologados ten

"As cooperativas non lle foron pedir a Juárez que lles faga de comercial senón que foron pedir apoio á participación da Xunta de Galicia nunha parte pequena do accionariado", expuxo Paz, quen defendeu a xestión do bipartito fronte á do Goberno actual. Entre outros exemplos, aludiu a que o prezo do leite nunca fora inferior ó francés ata agora e lamentou que Galicia sexa hoxe a comunidade que menos contratos homologados firma mentres antes era posta como exemplo polo propio Goberno francés.

O debate da moción foi seguido desde a tribuna por unha representación dos traballadores de Leche Pascual afectados polo ERE, que mostraron o seu pesar polo feito de que non prosperase a iniciativa dos socialistas.