Crean un antídoto contra tumores cancerosos en ratos

Científicos estadounidenses crearon un implante que actúa como vacina e que elimina tumores cancerosos en ratos, revelou un estudo divulgado onte pola revista Science Translational Medicine.

A técnica podería ter vantaxes sobre a quimioterapia e a cirurxía e podería aplicarse en combinación con outras terapias, de acordo co informe. Segundo os científicos da Universidade de Harvard e do Instituto Dana-Farber do Cancro, o procedemento que activa o sistema inmunolóxico tamén podería usarse noutros mamíferos.

O procedemento consiste no implante baixo a pel de pequenos discos plásticos impregnados con antíxenos tumorais específicos que reprograman o sistema inmunolóxico para atacar os tumores. Este traballo mostra o poder de aplicar de forma combinada procedementos da enxeñería (xenética) á inmunoloxía, sinalou David Moony, profesor de bioenxeñería da Escola de Enxeñería e Ciencias aplicadas da Universidade de Harvard.

"Ó combinar a enxeñería coa inmunoloxía coa colaboración de Glenn Dranoff, do Instituto Dana-Farber do Cancro, logramos un importante avance no deseño de vacinas efectivas contra o cancro", agregou. O procedemento dirixe o sistema inmunolóxico para loitar contra os tumores e parece ser máis efectivo e complexo ca outras vacinas actualmente en probas clínicas, segundo o informe. Esas inmunizacións convencionais extirpan as células inmunolóxicas e reprográmanas para que ataquen.