Cun test sanguíneo poderase detectar o alzhéimer temperán

Araclon Biotech, compañía española dedicada ao desenvolvemento de ferramentas de diagnóstico e tratamento do alzhéimer, presentou onte o novo "ABtest", un kit cuantificador da proteína beta amiloide 40 e 42 capaz de detectar o alzhéimer nos primeiros estadios da enfermidade, que só en España afecta a máis de 150.000 persoas.

Ata agora, o único método de diagnóstico para determinar se un paciente padece alzhéimer son os test cognitivos realizados polo neurólogo e a medición do nivel de proteínas beta amiloides (asociadas á formación de placas e nobelos no cerebro que provocan a neurodexeneración) a través dunha punción lumbar.

Neste sentido, o "ABtest" só necesita unha mostra de sangue do paciente para discriminar cun "alto nivel de sensibilidade e especificidade" os individuos sans, respecto dos que presentan deterioración cognitiva leve e enfermidade de alzhéimer, "con máis dun 90 por cento de fiabilidade e en só unha semana", asegurou a directora xeral de Araclon, Pilar de la Huerta. O "ABtest" "promete ser unha revolución no mundo sanitario e da investigación" desta enfermidade, xa que, na actualidade, o Alzheimer só se pode diagnosticar con seguridade post mortem ou en estados moi avanzados, cando a deterioración cognitiva é practicamente irreversible. Mentres que, se os próximos ensaios confirman a súa eficacia, nuns poucos anos poderase xeneralizar o diagnóstico.