Máis de 200 persoas, nas mans dos piratas

Máis de douscentos tripulantes permanecen secuestrados nos doce barcos procedentes de oito países que reteñen os piratas do Índico, segundo fontes dos servizos de intelixencia.

O secuestro máis longo é o do pesqueiro chinés Wynfar 161 que, baixo bandeira de Taiwán e con 30 mariñeiros, foi apresado polos piratas o 6 de abril. Outro dos buques, o cargueiro grego Ariana,con 24 persoas, e o neozelandés Charelle, con dez, foron secuestrados o 2 de maio e o 12 de xuño, respectivamente.

Un dos buques, o somalí de bandeira panameña Al Mezaan é sospeitoso de contrabando de armas e os servizos de intelixencia dubidan de se foi secuestrado ou está colaborando coa piratería.

Ademais, permanece en mans dos piratas o matrimonio que constituía a tripulación do iate británico Lynn Rival, secuestrado o 10 de outubro. Aínda que os servizos de intelixencia manexan a cifra de 200 secuestrados, o número de persoas retidas polos piratas pode ser moito maior, pois descoñécese cantas integran a tripulación do petroleiro Theresa 8, que navega baixo bandeira das illas Kiribati, e a do cargueiro das Illas Marshall Delvina.

Gran Bretaña, China e as Illas Marshall teñen cadanseus dous barcos en mans dos piratas, mentres que cinco proceden de Nova Zelandia, Senegal, Indonesia, Taiwán, e Somalia, xa que a procedencia do petroleiro se descoñece.