Firme apoio de Galicia á causa saharauí

O Parlamento galego expresou onte o seu "firme apoio" á causa saharauí e demandou o respecto aos dereitos humanos nos territorios ocupados, así como a liberación de todos os "presos políticos", mentres reclamou a restitución de todos os dereitos da activista Aminattou Haidar, coñecida como a Gandhi saharauí.

Así se pronunciou a Cámara galega nunha declaración institucional acordada polos tres grupos, lida en pleno polo vicepresidente do Parlamento, José Manuel Baltar.

"Ante a repunta da represión por parte de Marrocos contra a poboación civil saharauí nos territorios ocupados do Sáhara", o Parlamento galego considera "urxente" que se garanta a legalidade internacional e se poñan en marcha as diferentes resolucións do Consello de Seguridade de Nacións Unidas, relativas ao "dereito inalienábel do pobo saharauí á súa autodeterminación, á súa liberdade e á paz".

A declaración apunta, tamén, que o pasado 8 de outubro, sete "defensores pacíficos" dos dereitos humanos saharauís foron detidos no aeroporto marroquí de Casabranca cando regresaban de visitar as súas familias nos campamentos de refuxiados, e están agora á espera de ser xulgados por un tribunal militar de Marrocos. "O Parlamento de Galicia expresa a súa firme condena e rexeitamento á detención e esixe a súa inmediata liberación", di a declaración.

Ademais, o Parlamento recorda que o 13 de novembro, a Policía marroquí detivo no aeroporto do Aiún a Haidar, quen, desprovista de pasaporte, foi enviada ao aeroporto de Lanzarote, "involucrando o Estado español na expulsión" da muller por parte do Reino de Marrocos. Por iso, o Parlamento de Galicia invita a todas as institucións do Estado, especialmente ao Goberno central, a "seguir traballando para reclamar xustiza e paz, respecto dos dereitos humanos e apoio internacional para o pobo saharauí, empezando por Aminattou Haidar, esixindo a restitución de todos os seus dereitos".

Polo seu lado, delegacións de todas as comunidades autónomas de España (a de Galicia, o martes, 1 de decembro) viaxan a Lanzarote para acompañar e apoiar a folga de fame de Haidar e como denuncia ante o que consideran "o vergoñoso papel do Goberno español, convertido en funcionario de fronteiras marroquí".

denuncia o "silencio cómplice" do goberno

O coordinador xeral de IU, Cayo Lara (na foto, o domingo con Haidar), denunciou onte en Córdoba a "ilegalidade flagrante" que na súa opinión cometeu o Goberno marroquí no caso de Aminatu Haidar, así como o "silencio cómplice incomprensíbel" do Executivo español. En declaracións aos xornalistas, Lara reivindicou que o Goberno "devolva" a Haidar ao aeroporto do Aiún, aínda que denunciou que o Executivo marroquí "non a quere" alí porque é "unha persoa molesta", aínda que Lara a definiu como "unha muller plenamente pacifista".

Lara, que recordou que Aminatu Haidar leva once días en folga de fame e que "está disposta a chegar ata o final", esixiulle ao Executivo que "tome a decisión de devolvela ao Sáhara con todas as garantías".