Leire Pajín, senadora por fin con 38 votos a favor e 56 en branco

A secretaria de Organización do PSOE, Leire Pajín, foi elixida onte como senadora territorial pola Comunidade Valenciana no pleno de Les Corts con 38 votos a favor e 56 papeletas en branco.

Pajín seguiu a súa designación desde a tribuna de invitados do Parlamento valenciano acompañada doutros senadores socialistas, como Joan Lerma e Carmen Alborch, e da voceira do PSOE no Senado, Carmela Silva. Este pleno extraordinario, que espertou unha grande expectación mediática, contou coas ausencias do presidente da Generalitat, Francisco Camps, de seis conselleiros e do ex secretario xeral do PPCV e ex voceiro parlamentario Ricardo Costa, quen si asistiu ao pleno inmediatamente anterior sobre orzamentos.

En declaracións aos xornalistas tras recoller a súa credencial de mans da presidenta de Les Corts, Milagrosa Martínez, Pajín expresou a súa "satisfacción" pola elección, pero dixo que o "bloqueo" dos seis últimos meses por parte do PP "xamais debería ocorrer en Democracia".

"Espero e confío que xamais volva ocorrer", sinalou a socialista, para quen o pleno extraordinario de onte foi "un acto parlamentario de normalización democrática" que permitirá completar o grupo socialista no Senado. Pajín, quen comezou a súa intervención en valenciano e tras posar para os fotógrafos coa súa nova acta, manifestou "unha vez máis" o seu "compromiso" cos cidadáns da Comunidade, que segundo insistiu é a súa "terra", o lugar onde sempre militou politicamente e ao que se "enorgullece" de representar.

Esta elección pon fin a seis meses de proceso desde que os socialistas valencianos a propuxesen para o cargo en substitución de Perelló, quen renunciou ao escano para formar parte das listas do PSOE nas eleccións europeas pasadas. O PP, que propuxera a designación de Pajín para febreiro de 2010, decidiu finalmente fixala para onte para "abrir unha nova etapa", na que se vai intentar "evitar calquera tipo de confrontación que sexa allea á defensa dos intereses dos valencianos".