Venres 10.09.2010
| Actualizado 21.55
Hemeroteca web
|
RSS
RSS
|
 |
| Obama e mais a súa esposa Michelle ofrecéronlle unha cea de Estado ó primeiro ministro indio, Manmohan Singh FOTO: Michael Reynolds/EFE |
O presidente de EEUU Barack Obama anunciará o vindeiro martes nun discurso á nación desde a Academia Militar de West Point (Nova York) que as tropas de Estados Unidos non permanecerán en Afganistan máis de nove anos, informou onte a Casa Branca. O voceiro presidencial, Robert Gibbs, dixo, a preguntas dos xornalistas, que EEUU non planea estar no país centroasiático outros "oito ou nove anos".
Obama daralles un discurso ós cidadáns o vindeiro martes 1 de decembro ás 20:00 horas (2:00 horas do mércores en España) no que revelará a súa esperada nova estratexia para Afganistán, segundo anunciou Gibbs. O discurso realizarase desde a academia militar de West Point.
Segundo afirmou onte o xornal The Wall Street Journal, Obama enviará entre 20.000 e 40.000 soldados de reforzo a Afganistán, que se concentrarán na rexión sureña de Kandahar. O diario, que cita entre as súas fontes o novo comandante das forzas de coalición no sur de Afganistán, o xeneral británico Nick Carter, engade que os mandos castrenses xa preparan o despregamento das tropas adicionais.
"Os mandos militares en Afganistán dedicarán a maioría das novas tropas a controlar a conflitiva rexión sur do país e concentraranse especialmente nesa cidade (Kandahar), a principal base de poder dos talibáns", segundo o xornal.
Obama anunciará a semana próxima a súa estratexia, "pero ata antes de que o presidente presente o seu plan ante a opinión pública, os mandos militares sobre o terreo xa están listos para aplicar un plan que fai do establecemento dun círculo defensivo ao redor de Kandahar o eixe da loita que se aveciña", continua o artigo. Os mandos militares "planifican o emprazamento de miles de soldados, agora espallados no sur afgán, nun nutrido cordón ao redor das aforas de Kandahar", engade o diario.
Ao mesmo tempo, EEUU e os seus aliados centrarán no país a axuda económica, política e policial para persuadir os habitantes de que o Goberno afgán é mellor alternativa que os talibáns. Miles de soldados controlarán as rutas principais que pasan a través de Kandahar cara a Paquistán e o sur de Afganistán".
O mulá Omar augura o fracaso total
O líder dos talibáns afgáns, mulá Omar, afirmou onte que calquera nova estratexia de guerra decidida por Wáshington, incluído o envío de soldados adicionais, está condenada ó fracaso, e volveu rexeitar a petición de Cabul de manter negociacións. Nun comunicado público, pouco usual, publicado nunha páxina web talibá de cara á festividade musulmá de Eid al Adha, o líder talibán tamén lles pide ós afgáns que rompan os vínculos co seu Goberno "monicreque". Nunha parte do seu discurso, Omar diríxese "ós gobernantes da Casa Branca e ós belixerantes americanos", e afirma que Estados Unidos e os seus aliados se enfrontan a unha derrota "segura" en Afganistán e que ningunha estratexia funcionará, incluída as tropas adicionais. "É unha derrota que non pode ser evitada polo reforzo de tropas nin pola formulación de estratexias consecutivas e irracionais. É mellor que se elixa a vía do razoamento en vez do militarismo, ademais de poñerlle un fin á ocupación de Afganistán", indica o comunicado.
Wáshington, a ameaza para Irán
O presidente do Parlamento iraniano, Alí Lariyaní, reiterou onte que Estados Unidos constitúe a principal ameaza para Irán e recomendou non deixarse "enganar" por este país "arrogante". O político iraniano subliñou que "sería un grande erro crer que cos seus movementos, os esta- dounidenses cambian de postura respecto de Irán". Lariyaní subliñou que Wáshington foi unha ameaza continua para Irán desde o triunfo en 1979 da Revolución Islámica e sinalou que "os cantos de serea norteamericanos atraeron nalgunhas ocasións a diferentes gobernos" iranianos.
EEUU rexeita o tratado de minas
Estados Unidos reiterou onte a súa posición de que non asinará o tratado internacional de prohibición de minas terrestres, informou o voceiro do Departamento de Estado, Ian Kelly. "Decidimos que a nosa política sobre minas terrestres siga vixente", dixo o voceiro, que anunciou que EEUU enviará un grupo de expertos en minas á conferencia que se celebrará en Colombia para revisar o tratado. A pesar de non formar parte dos países que subscribiron a Convención de Otawa, EEUU estará presente como país interesado na seguridade global.
Reproches de Mahmud Abas
O presidente da Autoridade Nacional Palestina, Mahmud Abas, asegurou que o mandatario estadounidense, Barack Obama, "non está facendo nada" a favor do proceso de paz en Oriente Próximo. "Ata o momento non fixo nada, aínda que nos invitou a renovar as negociacións co Goberno hebreo. Espero que no futuro xogue un papel máis destacado e presione a Israel para que cumpra a lei internacional, para que implemente a Folla de Ruta", dixo Abbas, recalcando que a Administración Obama debía presionar a Israel a pórlle fin á construción de asentamentos.
