Berrogüetto, cósmicos

Xabier Díaz é a nova voz de Berrogüetto e supón a primeira vez que o grupo galego utiliza unha voz masculina nun dos seus álbumes FOTO: Axencias

Berrogüetto publicará novo disco no ano 2010 -Kosmogonías- cunha novidade: por primeira vez terán unha voz masculina, a de Xabier Díaz, novo integrante da formación dende a marcha de Guadi Galego en xaneiro de 2008.

Kosmogonías é o quinto traballo do grupo, un dos de maior repercusión internacional en Galicia, e nel tratan de enfrontarse a unha reflexión entre a humanidade e o universo para facer unha chamada cara á consecución dun sistema de organización máis xusto? O disco, en palabras dos membros do grupo, reúne "todas aquelas vontades colectivas ou individuais que cos seus xestos e actitudes traballan para mellorar a súa contorna".

O primeiro single de Kosmogonías será Danza de Meirol, que se pode descargar de xeito gratuíto e en exclusiva na web de R (www.mundo-R.com) dende hoxe. Danza de Meirol está baseada na tradición e foi recuperada grazas ao traballo de campo habitual dun grupo que compila os sons e as voces de Galicia, en moitas ocasións vivos só de maneira oral. Porén, o tema, seguindo o estilo definido por Berrogüeto, evoluciona a través dun tratamento contemporáneo.

O domingo 29 de novembro, ás 12:00 horas e no marco de AchegArte, espazo de encontro e intercambio da industria cultural galega, Berrogüetto ofrecerá un pequeno set acústico que se completará cunha sinatura de discos e coa escoita do single Danza de Meirol, unha oportunidade de intercambiar impresións cos sete membros do grupo.