"Son outros tempos"

Roberto Varela (á dereita) xunto a Francisco López durante a presentación da súa estratexia en política cultural FOTO: Axencias

"Rematar coas subvencións ás industrias culturais" é un dos obxectivos do conselleiro de Cultura, Roberto Varela, para esta lexislatura dentro da súa estratexia de difusión e promoción cultural do país. A xuízo de Varela, só erradicando as subvencións permitirá "falar con propiedade de industrias culturais", algo ao que se procederá mediante un "criterio de calidade, rendibilidade e excelencia artística o que se produce e edita"

Varela presentou onte en Ourense, xunto ao secretario de Promoción Cultural, Francisco López, as liñas que lle servirán de marco de actuación para os próximos anos, articulada sobre tres eixes primordiais: a promoción exterior dos signos de identidade de Galicia, a lectura e o aumento do consumo interno. No próximo anos, serán 17 millóns de euros os que a consellería pretende vehiculizar nos seus obxectivos, especialmente, a través do Ano do Libro e da Lectura, celebración que coincidirá co Xacobeo nas súas prioiridades para o 2010.

O conselleiro estableceu un estreito vínculo entre a erradicación das subvencións e a consecución dunha Marca de Galicia no exterior a partir da cultura galega . Trátase de que esa marca dote os produtos "dun valor intanxible que lle confira a simpatía do público potencial".

Para logralo, estima o conselleiro, é necesario un "redeseño da estratexia xerencial e de mercado" e a posta en marcha de "economías de escala e a adaptación e emprego estratéxico das novas tecnoloxías". Pero tamén cómpre diálogo e a cooperación entre "axentes culturais, institucións, administracións e industrias" para achegar consensos. Estes consensos son "indispensable para rematar coas subvencións ás industrias culturais".

As primeiras medidas irán encamiñadas para "adecuar" a política cultural aos "tempos que corren" e "sobre todo á situación de Galicia". e co fin de "consolidar unha estrutura loxística apropiada para cada sector produtivo das industrias culturais" o conselleiro mentou un Plan de ensinanzas artísticas e profesionalización destas industrias, en colaboración coa Consellería de Educación máis unha análise da presenza cultural de Galicia por zonas de influencia e a proposta de medidas de fomento para a difusión exterior da produción cultural galega en asociación con IGAPE.

Ao ver do conselleiro, as industrias culturais galegas non teñen futuro "sen un aumento dos índices de consumo cultural". Para iso, avogou por "cambiar os hábitos culturais" e sinalou que un dos obxectivos do departamento que dirixe será incidir máis no "consumo de cultura que na produción de cultura". Neste sentido, cualificou de "erro" considerar que o investimento en cultura resulta "improdutiva" porque os recursos empregados na súa difusión "son sempre un investimento que ofrece rendibilidade social" e, polo tanto, "non é un gasto".

Varela tamén sinalou que tamén traballarán na "promoción dos acenos de identidade" de Galicia, como o idioma, que debe "salvagardarse e promocionarse". É unha "necesidade", engadiu, que Galicia se abra ó exterior "nun mundo globalizado", así como de "redeseñar a estratexia de xerencia e de mercado" e de fomentar a "expansión e internacionalización das industrias culturais galegas".

Tamén indicou que o "problema" en Galicia "segue sendo" un consumo cultural "moi baixo" respecto de Europa, aínda que "non falta nin creatividade nin produción". Edítanse "moitos libros cun nivel moi alto" que despois non se traduce en que os libreiros vendan máis nin que os índices de lectura sexan maiores. Iso para min é unha obsesión, porque non podemos producir películas se non hai salas de cine", sentenciou o conselleiro.