Dobrovol"skij presenta as súas teorías en Compostela

O ruso Dmitrij Dobrovol"skij, un dos grandes especialistas en fraseoloxía a escala mundial, estará mañá en Santiago para presentar a súa última obra, Aspectos teóricos da fraseoloxía, que realizou xunto con Anatolij Baránov. A Secretaría Xeral de Política Lingüística, a través do Centro Ramón Piñeiro para a Investigación en Humanidades, publicou esta versión ao galego, primeiro e único idioma ao que foi traducido o traballo, escrito orixinariamente en ruso.

No acto de presentación, que terá lugar ás once da mañá na Facultade de Filoloxía da Universidade de Santiago de Compostela, participarán o secretario xeral de Política Lingüística, Anxo Lorenzo; o decano da facultade, Ernesto González; o académico Xesús Ferro, e a filóloga Carmen Mellado.

Anatolij Nikolaevich Baránov e Dmitrij Olegovich Dobrovol"skij son doutores en filoloxía, catedráticos e colaboradores do Instituto da Lingua Rusa da Academia das Ciencias de Rusia. A súa especialidade é a semántica lingüística, a lexicoloxía, a lexicografía, a lingüística de corpus e a fraseoloxía. Os dous son autores de varias monografías e dicionarios.