Ao outro lado de Xibraltar

Cinco filmes -dúas longametraxes, dúas curtas e un documental- forman o programa da I Mostra Itinerante de Cine Africano en Galicia, que hoxe comezará as súas proxeccións na Coruña para, posteriormente, visitar Santiago, Ferrol, Arteixo, Carballo, Ribeira e Rianxo. O ciclo, organizado pola Deputación da Coruña e Casa África, insírese nunha inciativa Cinenómada, que constitúe unha aposta de Casa África pola difusión do cine africano como panorámica da realidade cultural dese continente.

A programación e os obxectivos do ciclo foron presentados onte pola mañá, na sede da Deputación da Coruña, polo presidente provincial, Salvador Fernández Moreda, e polo director xeral de Casa África, Ricardo Martínez Vázquez.

Fernández Moreda explicou que con este ciclo preténdese achegar a realidade do continente africano á provincia da Coruña. Un continente diverso que "sufriu a explotación e a colonización de Occidente". A pesar de estar a piques de conmemorar -será o próximo 2010- o cincuentenario da independencia dun total de 17 países do territorio, engadiu: "África non é máis rico, nin ten máis prosperidade; ó contrario, a fenda da desigualdade segue aumentando. Os occidentais analizamos as realidades desde a óptica dos nosos propios valores, tratando de imporlles a nosa forma de vida a todos os demais".

O ciclo inscríbese dentro dun ambicioso programa de cooperación exterior da Deputación da Coruña, institución que desenvolve accións en Etiopía, Senegal, Kenya, Mozambique, Congo e Burundi, basicamente relacionados coa sanidade e a educación. As longametraxes que se proxectarán neste ciclo son: Faro la reine des eaux, coprodución na que participan Malí, Burkina Faso, Francia, Canadá e Alemaña, e que trata sobre as tradicións locais e a exclusión; e The Wooden Camera, ambientada nos suburbios de Cidade do Cabo, e na que se analiza a violencia persistente no país dez anos despois do fin do apartheid.

O ciclo inclúe tamén as curtas: Humanitaire!, rodada en Burkina Faso, e One Goal, produción española ambientada en Serra Leona; así como dun documental, Vitimes de nous richesses, no que se recollen os testemuños de mozos africanos tras intentar cruzar a fronteira española a través de Ceuta e Melilla.