Schoenberg conquista a Filharmonía de Galicia

O Auditorio de Galicia acolle hoxe, a partir das nove da noite, un concerto da Real Filharmonía de Galicia, baixo a dirección de Antoni Ros Marbà, cun programa que inclúe unha das mellores composicións de Arnold Schoenberg, Noite transfigurada. O programa complétase con Saturnal, que o galego Manuel Balboa, falecido prematuramente no 2004, compuxera precisamente para o nacemento da Filharmonía e que se estreou no concerto inaugural do 29 de febreiro de 1996. A segunda parte do concerto vaina ocupar a Sinfonía Xúpiter de Mozart.

Precisamente con este mesmo programa a orquestra viaxará a Madrid o 3 de decembro, onde actuará no Ciclo Orquestas y Solistas del Mundo de Ibermúsica, un dos mellores festivais musicais europeos.

A Noite transfigurada de Arnold Schoenberg foi obxecto dunha charla-coloquio que o mestre Ros Marbà mantivo cos alumnos do Conservatorio Profesional de Música de Santiago, o luns pasado.