Aumentan as discrepancias polo "paso" de Xustiza a Castela e León

A transferencia a Castela e León das competencias de Xustiza mantén vivo o debate entre a Junta e o Goberno, e onte viviuse un novo capítulo coa discrepancia do presidente autonómico, Juan Vicente Herrera, e a vicepresidenta do Goberno, María Teresa Fernández de la Vega.

Mentres para Herrera aínda hai "punto morto" no proceso de negociación porque non se financia suficientemente o traspaso por parte do Goberno central, para De la Vega a oferta é "moi beneficiosa e axustada para Castela e León", polo que animou á Junta a dar un "impulso" para pechar o acordo.

O presidente da Junta de Castela e León remarcou que a súa intención é que o traspaso repercuta nun mellor servizo ós cidadáns e que a súa negativa a recibir estas competencias non pode ser interpretado como unha "obstrución ó Goberno", xa que actualmente coexiste esta negociación nesta comunidade e en Castela-A Mancha, onde goberna o PSOE. Pola súa banda, a vicepresidenta salientou que "xa quixesen outros territorios" ter a valoración do traspaso que está tendo esta comunidade.