2.0 traduce "Non penses nun elefante!", de G. Lakoff

A editora 2.0 acaba de pór nas librarías as súas dúas últimas novidades nas coleccións Mundos (narrativa) e Supertextos (ensaio). Trátase da novela O home que era Xoves (Mundos 3), do autor inglés G. K. Chesterton, traducida por primeira vez á nosa lingua, e a tradución do best-seller Non penses nun elefante!, do lingüista George Lakoff.

O home que era Xoves foi todo un descubrimento para milleiros de lectores de todo o mundo no que vai de século (publicouse alá por 1908), pero ademais de ser xa un clásico das letras convértese hoxe en imprescindible para comprender boa parte das técnicas narrativas máis actuais e vinculadas a produtos de ficción de extrema actualidade coma as series Lost ou Heroes.

Non penses nun elefante! explica os avances políticos da dereita norteamericana e a súa utilización da linguaxe e do discurso para gañar adeptos e provocar que os datos da realidade ou os propios intereses deixen de ser, paradoxalmente, determinantes á hora de votar, por non adaptarse a marcos preestablecidos na mente dos electores.