Ametencia humana

O fillo de Novoneyra, Uxío Novo Rei, presidiu a marcha que recuperou para o uso o vello Camiño Real entre a Ferrería e Parada do Courel FOTO: FOTO: XURXO LOBATO

Parada do Courel, o lugar no que naceu Uxío Novoneyra en 1930, quedou onte desbordado pola presenza das máis de seiscentas persoas que se uniron ao chamamento da asociación de amigos do poeta para renderlle unha homenaxe popular en vésperas do Día das Letras.

Malia a ameaza do mal tempo, que obrigou a trasladar algúns dos actos previstos ao veciño colexio da Ferrería, os centos de asistentes fixeron a pé varios quilómetros atá a casa de Novoneyra, recuperando para o uso o vello Camiño Real que unía o Courel coa comarca de Valdeorras e que pasa, precisamente, por diante do predio dos Novo, un complexo de edificacións con aires de fortaleza rural que se reconstruíu por última vez a mediados do século XIX.

Ao longo do percorrido da marcha, encabezada por unha banda de gaiteiros, fixéronse sucesivas paradas que serviron para realizar lecturas de poemas ou observar os grandes paneis fotográficos de Valcárcel, instalados ao longo do camiño.

Diante da casa, entre unha altitude que se estendía polos soutos dos arredores, as rúas da aldea e a horta familiar, tivo lugar un recital a sete voces con algúns dos máis recoñecidos poemas breves do poeta, artífice dunha linguaxe de grande concesión expresivo. Foi, en palabra do fillo de Novoneyra, Uxío Novo Rei, un dos momentos máis emocionantes dunha xornada marcada pola presenza indeleble do célebre autor de Os eidos.

Despois de que un grupo de rapaces puxera dous ramos de flores no banco do adro do edifico, onde o poeta adoitaba sentar algunhas tardes de verán, a súa viúva, Elba Rei, ofreceulle a súa casa á multitude. Foi un xesto simbólico, fóra de programa, que lembraba o carácter de portas abertas da casa, meta durante décadas dos peregrinos que chegaban ao Courel atraídos polo telurismo magnético dos versos novoneyrianos.

A segunda parte da homenaxe tivo lugar no colexio da Ferrería, que a partir de agora levará o nome do autor. Alí, sucedéronse as intervencións, tanto de recoñecidos protagonistas da vida cultural galega -Isidro Novo, Ramón Caride Ogande e Vázquez Pintor, entre outros- como de courelaos que quixeron expresar os seus testemuños. Neste acto tamén participou un dos máis activos membros dos Amigos de Novoneyra, o escritor e poeta Xosé Lois García, autor así mesmo de dous libros editados recentemente que evocan a súa relación co autor.

Sesión extraordinaria da Real Academia Galega

O Courel volverá ser protagonista da vida cultural galega o vindeiro 17 de maio, cando a Real Academia Galega (RAG) celebre alí a súa tradicional sesión extraordinaria do Día das Letras, este ano dedicado a Novoneyra. O escenario será entón a antiga escola de Seoane -que xa acolleu a sesión de homenaxe a María Mariño no 2008- e, segundo a orde anunciada pola RAG, os encargados de participar nel serán Manuel Rivas, Margarita Ledo Andión, Darío Xohán Cabana e Manuel González. O presidente da institución, Xosé Luís Méndez Ferrín, pechará a sesión cun breve discurso.

Ese mesmo día, o Concello do Courel tamén bautizará oficialmente o colexio da Ferrería -un lugar próximo a Seoane- co nome de Poeta Uxío Novoneyra.