Á busca do bilingüismo restitutivo

Henrique Monteagudo con Antón Reixa, á esquerda, na presentación do documento FOTO: bruno r

Cuestionar o galego como un dos alicerces da sociedade -en pé de igualdade con termos como democracia, estatuto ou benestar- pode conducir a unha "crise moi seria: unha crise de convivencia e cohesión social gravísima", advertiu onte Henrique Monteagudo na presentación do documento Por un proxecto de futuro para o idioma galego. Unha reflexión estratéxica, elaborado polo Instituto Galego de Estudos Europeos e Autonómicos (IGEA) e presentado onte en Compostela polo propio Monteagudo xunto a Antón Reixa.

O documento busca superar a "situación de bilingüismo social desi-gual, diglósigo en orixe" e rescatar un "bilingüismo restitutivo ou de recuperación, isto é regalizador" para evitar a desparición do galego. "Hai quen pensa", subliñou Monteagudo" que o bilingüismo son dous monolinguismos e hai quen pensa que é unha estación de paso para o abadono do galego. Nós apostamos por un bilingüismo de competencia equilibrada e de atracción cara ao galego".

O IGEA escolleu este momento "porque é relativamente sereno e unha vez pasada a tormenta, era bo dar a vista atrás e ver o que pasou. Por que rompeu o consenso. Lamentablemente, demostrouse que o Partido Popular (PP), coa aprobación do decreto de plurilingüismo, trataba a cuestión lingüística unicamente como táctica electoral. Iso é tremendo". O galego forma parte dun modelo de sociedade, é estratéxico e non podemos poñer en cuestión cada vez que hai unhas eleccións.

O que está implícito no documento, engadiu Monteagudo, " é un chamamento á sociedade para que non tolere este tipo de xogos. O PP permítese actuar con esa frivolidade porque a sociedade non ten claro que a normalización forma parte integral da nosa sociedade".

Un dos temores de Monteagudo é que un hipotético triunfo do PP nas próximas eleccións municipais provoque cuestións como o cambio na toponimia da Coruña. O partido de Núñez Feijóo, asegura, "tería que situarse no dilema de derrogar da Lei de normalización lingüística, aprobada por unanimidade, pero ese é un risco ao que xa nos ten afeitos, como demostrou co Plan de normalización.

O informe, porén, non só se detén nos xogos dos populares: "A reflexión ten que atinxir a todas as forzas políticas porque todas teñen unha responsabilidade e deben revisar a súa traxectoria ante esta cuestión. Aos socialistas reclamámoslles unha posición máis compacta e coherente, mentres que ao BNG lle pedimos a revisión profunda das súas teses e a actualización do seu discurso de proposta para o galego".