Hemeroteca web | RSS  RSS     Martes 11.12.2018 Actualizado 21:23
El Correo Gallego Radio Obradoiro CorreoTV Anova

Galicia Hoxe

Maré

música

Cando a enerxía se transforma

A artista plástica Rebeca Ponte dá un xiro á súa carreira coa creación da cantante Cardigan Bridge

SUSANA FORMOSO . SANTIAGO   | 30.06.2010 
A- A+

Sanoguera
Rebeca Ponte convértese en Cardigan Bridge co seu primeiro disco
FOTO: Sanoguera

Un dos principios científicos máis consolidados refírese a que "a enerxía non se crea nin se destrúe, só se transforma". Varios séculos despois, este postulado atopa agora a súa aplicación práctica na artista Rebeca Ponte.

Destacada polo seu labor no mundo das artes plásticas, a moza coruñesa establecida actual­mente en Melide transfor­mou toda esa enerxía que a caracteriza para dar vida á cantautora Cardigan Bridge. A elección deste nome? Moi sinxelo. "É a tradución literal do meu ó inglés", indica.

Foi o ano pasado cando deci­diu quitar "a espiña" de can­tar as súas propias creacións. "Sacar un disco -que é autoproducido- era algo co que eu non contaba, pero o meu amigo Nacho Varela abriu o seu propio estudo na Co­ruña e aproveitei a oportunidade de producilo", explica. Foi a partir desta estreita colabora­ción co arranxista, músico e compositor cando se empezou a dar vida a un proxecto que esta tarde se converterá oficialmente en realidade. On the windowsill (Sobre o alféizar) é o título do primeiro LP que Rebeca Ponte -é dicir, Cardigan Bridge- presen­tará ás 21.00 horas no Playa Club da Coruña.

A pesar de ser máis coñecida polo seu labor como artista plás­tica, o traballo con música siem­pre estivo na súa carreira, pero usábaa "como complemento doutras disciplinas". De feito, Re­beca Ponte compuxo música tanto para as súas propias exposicións (como artista multidiscipli­nar que é), como para "pequenas obras de teatro, performances e pezas de danza".

Precisamente este eclecticismo -que encaixa á perfección coa súa personalidade e a súa carreira ar­tística- pódese escoitar en On the windowsill, un disco que nas súas nove cancións en inglés ofrece un crisol de estilos, pero cun denominador común: a música de autor. Segundo Ponte, é un LP "intimista. Son historias miñas e dos meus amigos que quería musi­calizar e contar, sen máis preten­sións. Como na vida, trátase de compartir cousas e pasalo ben, gozando sempre do que un fai", explica a artista, que non oculta o seu nerviosismo ante a presentación de hoxe na Coruña. O acto será en formato acústico, "dun modo próximo", onde Cardigan Bridge acompa­ñará as súas cancións coa percu­sión de Cibrán Rey e os acordes da guitarra de Fran Brea.

Aínda que a presentación oficial é hoxe, "a primeira experiencia co disco xa foi no ciclo Vivas de Madrid, que está cen­trado en música feita por mulle­res". Guitarra en man, Cardigan Bridge mostroulle o 16 de xuño ó público madrileño algunhas das súas composicións, contando cunha moi boa acollida.

En canto ós seus plans de fu­turo, Cardigan Bridge ofrecerá o próximo día 11 de agosto un con­certo acústico en Casa Doñano, en Ribadeo. Terá lugar a partir das 23.00 horas.

Xa para o próximo 5 de se­tembro, Rebeca Ponte partici­pará na estrea dunha obra de teatro codirixida e coproducida pola actriz Ana Asensio.

"THE DIVA"

Colabora coa actriz Ana Asensio

The Diva chegará ó teatro Gene Frankel de Broadway e esta re­presentación, cunha parte de musical, contará coa música de Cardigan Bridge. Cabe desta­car que este proxecto é o resul­tado da estreita colaboración da actriz Ana Asensio con Rebeca Ponte. De feito, é a protagonista do seu primeiro vídeo, One thousand poems, gravado na praia das Catedrais de Ribadeo.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS