Cultura recupera o Castro das Barreiras de Vimianzo

Roberto Varela (esquerda) na Feira do Cogomelo de Curtis

Un equipo de arqueólogos traballa na recuperación do castro das Barreiras en Vimianzo para pór en valor este xacemento singular, segundo informou onte a Consellería de Cultura, que explicou que as accións se iniciaron o pasado 10 de outubro e se prolongarán ata que finalice o mes.

Os traballos consisten na limpeza e acondicionamento do xacemento, na retirada de biomasa e na documentación gráfica exhaustiva cunha topografía de detalle e fotografía aérea. Son accións "brandas e non agresivas", apuntou o departamento que dirixe Roberto Varela, que sinalou que son necesarias para unha posterior posta en valor do complexo.

O director dos labores, Ángel Concheiro, asegurou que o xacemento "ten moito valor" como recurso cultural e turístico e destacou que Vimianzo debe aproveitar a súa situación, pois se atopa "enmarcada por dous xacementos fortificados singulares", o cal é "un luxo".

O castro das Barreiras está no fondo do val de Vimianzo e nel apréciase unha "estrutura arquitectónica espectacular", agregou Cultura, que explicou que tal estrutura se define polos vestixios do foso e unha "potente muralla" que supera os oito metros de altura nalgúns puntos. "Estas defensas colosais non son habituais nos xacementos castrexos e demostran que o castro das Barreiras foi, no seu día, un poboado importante e que era, probablemente, máis extenso do que hoxe se conserva", afirmou o departamento.