Contra os estereotipos

Pola dereita, Suheir Hammad, Farah Hamed e Maryam Juma, no encontro de onte cos xornalistasma

Unha muller decide ser policía, pero para cumprir o seu soño terá que romper cos estereotipos e enfrontarse ás reservas dunha sociedade rural tradicional. Seu pai e seu tío opóñense, pero ela é unha persoa forte que ten claro o que desexa e fai todo o que debe facer. Este é o celme do documental A muller policía, da directora xordana Maryam Juma, que onte proxectou o Festival Internacional de Cinema Auro-Árabe Amal.

Un filme que constitúe un exemplo do aumento recente do número de mulleres policía nas rúas de Ammán, ademais dunha proba da loita que moitas mulleres árabes están a levar a cabo por ser elas mesmas, a contracorrente dos roles de xénero máis tradicionais. A organización de Amal xuntou a Juma, á escritora palestino-americana Suheir Hammad e á actriz e membro do xurado deste certame Farah Hamed nun encontro cos xornalistas na que se reivindicou unha mudanza dos estereotipos dominantes en Occidente sobre as mulleres árabes.

"Eu creo que é un problema de ignorancia. Nós mesmas podemos servir para romper o clixé da muller á sombra do home. A realidade é máis complexa. As mulleres árabes somos moito máis que o tópico da muller con veo", salientou Hamed. "Por ser muller árabe non tes que levar veo. Nin un pano ten que significar opresión. Para moitas mulleres, é simplemente unha cuestión de tradición e non de relixión. Podes ser árabe cristiá, musulmá, ou non relixiosa", indicou Juma, quen apuntou ademais a necesidade de diferenciar a situación das mulleres no rural, -nas sociedades máis tradicionais-, e nas cidades, e nos distintos países -na zona do Golfo, a sociedade é máis conservadora-.

Hamed subliñou a loita individual de moitas mulleres por cambiar as cousas. "Hai moitas mulleres artistas marabillosas no mundo árabe, pero non son coñecidas. Hai unha visión racista, e unha tendencia a enmarcarnos", comentou. Juma lamentou que en Xordania, as autoridades non favorecen a loita das mulleres -si o fai o Rei, dixo-, e recoñeceu que en certos lugares tivera que deixarlle a cámara a un compañeiro para gravar.

"É certo que te poden mirar como a rara, a estranxeira, e que pode haber medo á occidentalización", sostivo Hamed, que se criou en Marrocos. "Cando estás fóra do teu contorno e te rexeitan, te miran como se foses terrorista, reafírmaste na túa identidade, e podes poñer o veo como un signo de que estás orgullosa de ser quen es. Teño amigas que levan veo, como outras levan un crucifixo. En Marrocos hai mulleres que estudan, saen...", dixo.