O fime "Celda 211" abrirá o Festival de Cine de Ourense

A película Celda 211, do cineasta Daniel Monzón, inaugurará a XIV edición do Festival Internacional de Cine de Ourense, que se desenvolverá entre os días 10 e 17 de outubro na capital das Burgas e que contará cun total de 53 producións entre longametraxes (13), curtametraxes (30) e documentais (10) que competirán nas diferentes seccións e que foron seleccionadas entre 1.250 filmes que se presentaron ó festival.

A película inaugural, de produción galega e que conta entre o seu cartel de actores con Luis Tosar, será proxectada tras o acto de apertura oficial do certame, que se desenvolverá o día 10 de outubro.

O xerente do festival, Enrique Nicanor, salientou algunhas seccións como Amores Difíciles nas que se tratarán "as dificultades das parellas a través das películas de todo o mundo", a de Cine Emigración "que é xa tradicional", "cine e Muller" ou "Cine nas aulas".

Por outra banda, manifestou que se poderá visionar unha selección de películas de Hungría, que conta cunha "excelente cinematografía" xa que ten "calidade de directores e produtores".