Galego de adopción

Tim Bherens naceu en Londres (1937) pero desde hai algo máis de vinte anos reside na Coruña. As razóns dese traslado seguen a ser hoxe un enigma que o pintor rexeita desvelar, do mesmo xeito que se nega a esclarecer da súa ruptura con Lucian Freud tras oito anos de relacionarse a diario e de influenciarse mutuamente. Agora, Bherens revisa o conxunto da súa obra nun volume da colección Grandes pintores que edita a Deputación da Coruña e que onte foi presentado polo presidente da institución, Salvador Fernández Moreda, e o propio artista, autor tamén dunha abondosa produción literaria representada no volume.

Moreda definiu a Bherens como "galego de adopción" e "un representante máis da plástica contemporánea en Galicia". Un home que sempre se considera un membro da escola da Coruña máis que da Escola de Londres, nun universo estético onde inclúe a pintores como Abelenda, Correa Corredoira, Alberto Carpo, e outros creadores coruñeses.

No libro, unha coidada edición de máis de duascentas cincuenta páxinas, condénsase a esencia da biografía e a obra dun "artista complexo e singular, que se expresa en dúas linguaxes: a pictórica e a literaria", segundo o define Xulio López Valcárcel, un dos colaboradores do volume, coordinado por María Cabrera e a muller de Bherens, a tamén pintora Diana Aitchison. Ademais de fotografías persoais e reproducións das obras principais do artista, inclúe textos de José Ramón López Calvo, Ana Vasco, Felipe Peña, Isabel Bugallal e José Luis Ducid. Do mesmo xeito que en anteriores ocasións, editáronse tres mil exemplares, que sairán ó mercado do libro da man de Galaxia.

Moreda definiu a Behrens como "un artista "poliédrico" e "un creador ecléctico", para quen "a pintura é o equilibrio do pintor desequilibrado". Un artista, engadiu o presidente da deputación, "que non deixa impasible o espectador".

Pola súa banda, José Ramón López Calvo cualificou a obra de Behrens como "fantástica" e "de gran calidade". "Unha obra -sentenciou- resistente e consistente, á marxe dos circuítos da arte". López Calvo definiu o pintor como "unha persoa de gran humildade", que abandonou os seus contactos coa Escola de Londres, e con outras correntes artísticas, protagonizando unha fuxida para buscarse a si mesmo.

O pintor agradeceu a colaboración dos autores dos textos e ao presidente Salvador Fernández Moreda, a quen cualificou como o "arquitecto" deste proxecto. Tim Behrens afirmou sentirse orgulloso por formar parte esta colección, na que se inclúe "un grande amigo como Alfonso Abelenda, aínda que o foi antes por ter máis idade".