A Granell abre unha mostra sobre o álbum en Dinamarca

A mostra irá acompañada de obradoiros para nenos e adultos FOTO: ramón escuredo

A Fundación Eugenio Granell, situada en Santiago de Compostela, acolle desde onte unha exposición sobre a tradición e evolución do álbum ilustrado en Dinamarca a través das ilustracións das súas 30 mellores obras desde os anos 40 e ata a actualidade.

A exposición itinerante, organizada polo Consello das Artes de Dinamarca e a Embaixada de Dinamarca en Madrid e comisariada por Ainara Benzanilla, recolle exemplos clásicos do álbum ilustrado, aínda que tamén outros "transgresores" e actuais que "pon de relevo" a "gran variedade" que existe dentro deste xénero en Dinamarca.

En Dinamarca publícanse ó ano uns 2.000 títulos de literatura infantil e unha alta porcentaxe destes libros reflicten o concepto que os daneses teñen do neno como un ser "competente, con capacidade de pensar por si mesmo e coa necesidade de contar con manifestacións artísticas e culturais de calidade". "Estes libros son transgresores na linguaxe e nas ilustracións, no contido e na composición", segundo os seus organizadores.

Ademais de poder contemplar obras de artistas como Arne Ungermann -a máis antiga, de 1943- ou Dorte Karrabaek, os asistentes poderán participar nun programa de actividades paralelas para nenos e adultos. En concreto, os organizadores levarán a cabo visitas e obradoiros para nenos e e familias, estudantes e profesionais.