Ir Indo presenta o seu Digalego, que recoñece 415.000 entradas

O persoal e alumnado dos centros educativos e a páxina web da Xunta contan cun novo servizo en liña para facilitar o uso do galego. Trátase dun sistema que permite consultar o dicionario de galego Digalego e a Enciclopedia Galega Universal, dúas ferramentas creadas por Ir Indo Edicións.

O director desta editora, Bieito Ledo, explicou que o dicionario, -é necesario rexistrarse para poder utilizalo-, recoñece 415.000 entradas. "O noso dicionario en papel ten 65.000 entradas. O Digalego engade a etimoloxía, equivalencias en sete idiomas e conxugación de verbos. Recoñece o singular e o plural dos substantivos; o feminino, o masculino, o singular e o plural dos adxectivos, e 67 formas por cada verbo. Así chégase ás 415.000 entradas. Pódense buscar as palabras pola súa equivalencia en francés, inglés, portugués, alemán e italiano: de momento en chinés non, aínda que se as buscas en galego dáche a equivalencia nos sete idiomas, para a maioría das palabras".

Para utilizalo, na web da Xunta basta con facer doble clic sobre a palabra a buscar. Desde a Enciclopedia, -egu.es-, pódese acceder a fotografías e gráficos, escoitar as entradas polo altofalante en galego e ver o contido enciclopédico de cada definición. O Digalego inclúe sinónimos, antónimos e variantes, pódese acceder a el dende o móbil con wap.digalego.com. ou incorporalo ó navegador web.