Liberdade e xustiza

Hessel durante a rolda de prensa que deu onte xunto a José Luis Sampedro para presentar o seu manifesto FOTO: efe

"Indignádevos!", berra Stéphane Hessel, un nonaxenario que particpou na resitencia francesa contra o nazismo e que acaba de converterse nun fenómeno editorial en Francia cun libriño de trinta páxina onde lle pide á xuventude que se rebele contra a "ditadura dos mercados". O libro foi traducido ao galego por Factoría K despois de vender en Francia case dous millóns de exemplares.

Hessel pasou onte por Madrid para presentar a edición en castelán e catalán realizada por Destino -tamén apareceu en éuscaro a través da editorial Cenlit- , acompañado por outro histórico da resistencia, José Luis Sampedro, quen avogou pola "liberdade de pensamento" como salvoconducto cara ao futuro.

Aos seus 93 anos, os dous veteranos comparten a "indignación" ante as inxustizas e a "preocupación" por conseguir que a súa mensaxe de "liberdade e xustiza" alcance os mozos para que saían do "desánimo" e da "indiferenza", para que se comprometan e renoven a sociedade.

Sen perder o sorriso e cun falar intenso e pausado, Hessel xustifica o enorme éxito do seu manifesto, que apareceu nun "momento crucial da evolución da sociedade mundial". Optimista, sinala, como exemplo esperanzador, o "xurdir dunha mocidade non violenta, pero eficaz", nos países árabes sacudidos por unha onda de desexo de liberdade e de xustiza. Desexo de liberdade e de xustiza, dixo, que sempre animou a súa vida.

Nacido en Berlín en outubro de 1917, en plena Revolución Rusa, viviu de cheo a Segunda Guerra Mundial, cun destacado papel na Resistencia francesa, foi torturado e deportado, pasou por tres campos de concentración, burlou a morte apropiándose da identidade doutro preso e evadiuse dúas veces.

Tras a gran contenda bélica foi diplomático e formou parte, en 1948, do equipo redactor da Declaración Universal dos Dereitos Humanos. Unha bagaxe que avala e reforza a súa exhortación contra a indiferenza, para el "a peor das actitudes", e clama pola insurrección pacífica, ó estilo de Mandela ou Martin Luther King, fronte ó "inaceptable: as inxustizas".

E é que os principios e valores polos que el loitou, di, "son hoxe máis necesarios que nunca" e, ademais, están "en perigo".

"Os mozos de agora xóganse a liberdade e os valores máis importantes da humanidade", advirte o comprometido intelectual desde a altura de miras que lle dá a súa experiencia, o seu compromiso, e os seus 93 anos, "a última etapa. O final xa non está moi lonxe", apunta.

Unha "verdadeira" democracia necesita, recorda, unha prensa "independente" capaz de situarse fronte á "ditadura actual dos mercados financiarvos que ameaza a paz e a democracia" e que "tutelan" os estados.

Ao longo da súa longa vida, Hessel, que se naturalizou francés en 1947, séntese afortunado por "a sorte de ter unha sucesión de razóns" para indignarse, e, cita en concreto, como a última delas, a situación en Palestina. E resúltalle "insoportable" que "os propios xudeus poidan perpetrar crimes de guerra", tras sufrir o Holocausto.

Tamén se mostra tallante en contra do terrorismo, que cualifica de "abominable", "inaceptable" e "ineficaz", e advirte que unicamente se poderá derrotar o terrorismo islamita "coa non violencia e o respecto mutuo de culturas". O seu desexo é que todos atopen un motivo de indignación, "un valor precioso", nas súas propias palabras, e para atopalo, conclúe, só basta con mirar ó redor: "Buscade e atoparedes!".