Libros ás marxes dos catálogos

Penélope Pereira FOTO: AXENCIAS

Aínda que se bautizaron "por votación democrática" como Barbantesa, non pretenden "comer os machos"... Co logotipo da "mantis relixiosa" identifícase unha nova editorial galega -dirixida dende Sevilla por Penélope Pedreira aínda que a súa xestión administrativa e técnica se artella dende Cangas- creada coa vocación de publicar poesía, literatura de muller e literaturas africanas "as recuadas e periféricas, a literatura diferente, orixinal e fresca... tanto se é recente coma se se conserva intacta no formol do tempo".

Penélope Pedreira explica que decidiron crear este novo selo porque o proxecto de Rinoceronte Editora -do que é cofundadora xunto a Moisés Barcia- "está moi pechado, moi especializado nas traducións ao galego, e había obras que non cabían, como a literatura de muller, a poesía, e outros xéneros como o teatro e o ensaio". Así foi como decidiron que "o que noutras editoriais figura á marxe dos catálogos, sexa o groso da nosa e, sobre todo, porque queriamos guiarnos polos nosos gustos persoais, aquilo que moitas veces cae nas túas mans e che gustaría ver editado", subliña Pedreira.

Barbantesa toma pulo editando dous poemarios: Con peitos desenchufados de Elías Portela, "un libro de poemas moi libre e particular" e Pan prós crocodilos do profesor pontevedrés Calros Solla, cos seus versos "irreverentes e orixinais".

Dúas traducións ao galego de McCullers e Jaeggy

A editorial tamén tirará do prelo a finais de xuño dúas traducións ao galego de dous autores dos que aínda non se publicara nada no idioma do país. Trátase do libro de relatos A balada do café triste de Carson McCullers e a novela Os ditosos anos do castigo de Fleur Jaeggy.

Nunha segunda tanda, sairán Poemas de África lonxe de Eduardo Bettercourt e Jorge Arrimar así como a novela de Berta Dávila A arte do fracaso e As Médulas de Silvia Bardelás. "Non partimos dun manifesto nin somos voceiros de ningún grupo, así que non nos pidas disciplina, puntualidade nin maior coherencia que esta do noso propio gusto", advirten na súa páxina web, www.barbantesa.com.

"O único criterio é aquilo que nos gusta, só iso", remarca. A elección do nome da editorial foi "por votación democrática, xa que nos pareceu que a barbantesa é un becho simpático, e un nome sonoro, pero non pretendemos comer os machos", chancea Penélope Pedreira.

As obras distribuiranse a través das librerías galegas, na páxina web Toupa.net e, no caso de non atopalas, tamén se pode pedir enviando un correo electrónico a info@barbantesa.com. Ademais, tamén ofrecen a posibilidade de susbcribirse para enviar cada novo libro que editen, cun desconto do 15 por cento e cos gastos de envío de balde.