A lingua, de rebaixas

Os proxectos dos Equipos de Normalización quedaron paralizados polo atraso na concesión das axudas FOTO: Kiko Delgado

A maioría dos Equipos de Normalización Lingüística dos centros de ensino galegos notaron este ano unha redución das axudas que recibían de Política Lingüística para potenciar o uso do galego entre os estudantes. Segundo denuncian dende a Coordinadora de Equipos de Normalización e Dinammización Lingüística do Barbanza, hai casos tan graves como o do colexio público de Aguiño onde de recibir unha subvención de 2.500 euros en 2009, este ano só se lle concederon 833 euros. "Esta medida deixa o centro nunha situación de precariedade no ámbito lingüístico", advirten dende o blog da Coordinadora.

Anxo Louzao, mestre neste centro educativo de Ribeira e ademais presidente da Coordinadora do Barbanza, asegura que se o descenso orzamentario para estes equipos en toda Galicia se sitúa nun 20%, no caso desta comarca, chega a ser "alarmante" cunha rebaixa do 35% nas axudas. "Hai moitos centros con menos da metade da partida económica do ano pasado", denuncia.

No caso do colexio de Aguiño, ademais, non entenden a que se debe unha redución económica tan drástica xa que "o proxecto que presentamos este ano é case igual ao do ano pasado", indica Louzao. En todo caso, este descenso, segundo advirte, está a afectar ós proxectos destes equipos. "Levamos todo o ano practicamente co noso traballo paralizado. As axudas acaban de concederse agora, cando só queda mes e medio para que remate o curso. É unha falta de sensibilidade cos nosos proxectos. No noso centro, en Aguiño, repercútenos no feito de que este ano non poderemos sacar a revista do centro por primeira vez dende que se creou", afirma Miguel Louzao.

"Se non temos axudas, seremos figuras decorativas"

A isto engádese que os centros que acaban de recibir esta subvención teñen de prazo até que remate o curso -pouco máis dun mes- para gastar e xustificar a partida económica que lle corresponde. "Hai que ter en conta -apunta o profesor- que os Equipos de Normalización vivimos desta subvención anual" xa que non está establecido que cada centro destine unha contía económica para eles. Na súa opinión, se continúa a rebaixa de axudas, o seu traballo vaise ver condicionado para o futuro. "Se non temos orzamentos, estaremos como este ano, paralizados, como se fósemos figuras decorativas, o cal causaría un prexuízo máis á educación", apunta.

O de Ribeira non é o único centro que viu reducidas as súas axudas para os Equipos de Normalización. Se comparamos as contías recibidas o ano pasado coas deste ano, centros como o IES Lamas de Castelo de Carnota tamén pasou de recibir 2.500 euros en 2009 a só 699 este ano; ou o colexio Salustiano Rei da Pobra do Caramiñal, que de contar con 2.500 euros, en 2010 a contía redúcese até os 760 euros.

Con esta denuncia, a Coordinadora de ENDL do Barbanza reacciona tamén á "prensa da comarca, que nos últimos días non facía máis que sacar as mensaxes de que a Xunta está dando axudas para os centros de ensino, cando non é certo".