A loita en defensa do monte comunal

Seném Outeiro é o responsable da cinta que se estrea o domingo

Seném Outeiro presenta o documental O Espírito das Trincadeiras este domingo ás sete da tarde no Auditorio Municipal de Goián. O proxecto está producido pola empresa audiovisual Fílmika Galaika coa axuda da Axencia Galega das Industrias Culturais (Agadic) e patrocinado polo Concello de Tomiño e a Comunidade de Montes de Goián. Seném Outeiro, un historiador que participou como guionista e director, narra neste filme a loita que no ano 1990 a localidade de Goián desenvolveu na defensa do monte comunal das Trincadeiras.

Este terreo en mancomún era solicitado en expropiación pola empresa que construía a autopista Vigo-Porriño. Goián opúxose a esta expropiación e, tras conseguir a súa vitoria, celebrou anualmente unha festa de exaltación das Trincadeiras coma movemento veciñal e como posta en valor dos espazos comunais.

A través das declaracións dos protagonistas e con abundante documentación gráfica e audiovisual o director constrúe esta proposta: "A cinta é unha homaxe á vontade colectiva, unha historia cargada de emotividade e reflexión sobre a importancia da memoria histórica coma alicerce do ser social", en palabras de Outeiro.

"Foi un traballo moi elaborado e responsable por parte de toda a equipa que conformamos este filme pero gratamente recompensado pola oportunidade de coñecer a esencia dunha comunidade tan peculiar e chea de feitizo como é a do pobo de Goián" apunta o director.