Máis pexas da Xunta ás probas de galego

Exames do Celga FOTO: AXENCIAS

Despois de que esta semana, a Secretaría Xeral de Política Lingüística publicase a convocatoria de 140 cursos Celga, a Mesa pola Normalización Lingüística amosou a súa preocupación porque a cifra representa unha rebaixa de 45 cursos. A asociación considera “moi insuficiente” a convocatoria porque “non garante a demanda que existe na sociedade” e deixará, engadiu, moitas persoas “sen a formación en galego que queren conseguir”.
“O mínimo que se lle pode exixir a unha política lingüística seria e responsábel é que haxa cursos para aprender ou mellorar o galego para aquelas persoas que queiran, mais nin iso garante o goberno de Alberto Núñez Feijóo. De que hipócrita liberdade lingüística presume o presidente da Xunta se nin tan sequera garante prazas para quen quere aprender galego?”, observa o presidente da Mesa, Carlos Callón, nun comunicado.
A Mesa critica tamén que se reduza a unha única convocatoria anual a posibilidade de conseguir o CELGA, o cal “lle pode provocar un prexuízo irremediábel a quen o precisar para un proceso selectivo, concurso de traslados etc”. A maior asociación cultural de Galiza non dubida en atribuír tal decisión a un “obxectivo consciente de fomentar un clima social contrario ao galego”, o cal cualifica de “incívico e irresponsábel”.
Esta convocatoria anual será en xuño, mentres que nos anos anteriores había probas en maio e en novembro. Quen suspenda agora, terá que agardar un ano enteiro para se poder presentar de novo.
Callón lembra tamén que a Secretaría Xeral de Política Lingüística non garante que os cursos que se vaian solicitar se chegen a realizar. Deste xeito, aínda que nun concello ou nunha asociación abran un prazo de preinscrición e se anoten vinte persoas, non existe ningunha garantía de que ese curso se vaia ministrar.