Mari Boine, en Santiago

Mari Boine presentará en Compostela o seu último disco de estudio, ‘Sterna Paradisea’ FOTO: AXENCIAS

Mari Boine medrou en Laponia sentindo vergoña das súas raíces. Prexuízos que máis tarde transformaría, a través da música, nunha das defensas máis firmes da lingua e cultura sami. "Nos últimos dez anos estiven loitando contra ese sentimento de inferioridade respecto aos noruegueses e aos occidentais e a miña voz foise facendo máis forte a medida que tomaba a determinación de que ninguén podía oprimirme, e que tiña valor como sami", aseguraba a artista nunha entrevista concedida o ano pasado. Mari Boine naceu no seo dunha familia de pescadores moi devota. Tras a súa participación nos festivais Womad, publicou Gula Gula en 1990, o que lle abriría as portas do mercado internacional. Á parte da súa propia discografía, colaborou co gran músico de jazz Jan Garbarek no disco Twelve Moon e participou nas gravacións doutros artistas noruegueses, ademais de compor música para obras de teatro, exposicións de arte e a película The Kautokeino Rebellion.

No seu último disco de estudio, Sterna Paradisea, rodeouse dun grupo fantástico de músicos noruegueses e africanos. O resultado é unha música telúrica que nos achega ás paisaxes xeadas de Escandinavia atravesadas por sonoridades urbanas. A escritora Lucía Etxeberría expresaba na revista Rolling Stone o impacto que lle causou o directo de Mari Boine: "Por veces lembra ao flamenco, na fondura e no laio, nesa especie de dimensión rota e ferida da voz. O concerto foi impresionante, inesquecible, hipnótico".