Ola a todos

O Senado é a cámara territorial do Estado español e ata agora nela non se admitía falar nas linguas cooficiais FOTO: efe

As linguas cooficiais entrarán de froma normalizada no Senado español no primeiros pleno deste período de sesións, os próximos 18 e 19 de xaneiro. A Cámara Alta cumprirá así a reforma do Regulamento acordada por todos os grupos parlamentarios para ampliar o uso das linguas cooficiais, xurdida por mor da iniciativa que presentaron 34 senadores, ningún deles encadrados no nacionalismo español. O uso dos idiomas cooficiais custará 11.950 euros por sesión, cifra moi criticada, precisamente, polo nacionalismo español, que o considera un gasto superfluo. Mentres que as axencias españolas informaron onte polo miúdo do gasto que supón o novo servizo, non informaron pola contra dos postos de traballo que se crearán.

No primeiro pleno do ano, os senadores poderán intervir nas catro linguas cooficiais -catalán, valenciano, eúscaro e galego- durante o debate das mocións. Para que ese debate poida ser seguido por toda a Cámara, o Senado adquiriu 400 auriculares que se colocarán nos escanos e desde os que escoitarán a tradución que realizarán sete intérpretes -tres para o catalán e o valenciano, dous para o galego e dous para o eúscaro-, segundo fontes parlamentarias.

Os intérpretes unicamente traducirán a lingua cooficial ao castelán e non ao revés, isto é, non haberá tradución do castelán a ningunha lingua. Tampouco haberá tradución dunha lingua cooficial a outra.

Os tradutores non estarán fisicamente no pleno xa que o hemiciclo non dispoña de cabinas de interpretación, senón noutra sala do Senado desde a que verán o desenvolvemento da sesión polo circuíto interno de televisión para poder realizar a tradución simultánea.

Así, a Cámara Alta non tivo que realizar ningunha obra de infraestrutura para ampliar o uso das linguas -ata agora restrinxido á Comisión Xeral de Comunidades Autónomas- xa que o único investimento que realizou foi a adquisición dos 400 auriculares.

O Senado destinou ó uso das linguas cooficiais unha asignación de 350.000 euros nos seus Orzamentos para 2011, que inclúe non só o servizo de tradución nos plenos, senón a transcrición escrita na lingua correspondente que se incluirá a partir de agora no Diario de Sesións.

Dos 350.000 euros asignados, 250.000 serán para as traducións nas sesións plenarias, e 100.000 para a Comisión Xeral das Comunidades Autónomas.

A primeira ocasión en que se oirán as catro linguas cooficiais será esta sesión plenaria extraordinaria dos días 18 e 19 de xaneiro, cuxo orde do día deberá decidir a Deputación Permanente o día 11.

Do mesmo xeito que ocorreu no pasado mes de xullo, o Senado celebrará este pleno extraordinario nun período no que tradicionalmente houbo "vacacións parlamentarias", posto que a Constitución establece que as sesións plenarias celebraranse de febreiro a xuño e de setembro a decembro.

A reforma do Regulamento que permite o uso limitado das linguas cooficiais no pleno foi ratificada o pasado 21 de xullo co voto en contra do PP. O PSOE defendeu sempre que a súa posta en marcha non aumentou o Orzamento do Senado que, ata, se reduciu nun 6,2 por cento para 2011.