O PP apoia o Bloque na difusión do Himno galego

O vicesecretario xeral do PPdeG Diego Calvo coincidiu onte co vicepresidente da Xunta, Anxo Quintana, en que o himno galego "debe ser coñecido por todos" os galegos, aínda que advertiu de que "hai problemas máis importantes" dos que se debería preocupar o Goberno galego.

Quintana asegurou o sábado pasado que o himno galego "é o compás que oficializa os sentimentos de Galicia como país" e apostou por aproveitar o ano do centenario da súa primeira interpretación para que non haxa ningún neno en Galicia "que non coñeza e saiba cantar os versos do bardo de Bergantiños".

Consultado por estas manifestacións nunha roda de prensa, Diego Calvo considerou que "o himno debe ser coñecido por todos", pero advertiu de que "a quince días do comezo do curso" hai outras prioridades por resolver, como a cuestión dos comedores escolares, "que aínda non se arranxou".

Os populares saen así ao paso da polémica aberta nos últimos días sobre as palabras de Quintana, mal recibidas en certos ámbitos próximos ao PP madrileño. Distintos intelectuais, porén, manifestáronse subliñando que o Himno galego obedece a unha cuestión de identidade e pertence, ademais, a un dos poetas europeos do seu tempo, Eduardo Pondal. Este ano, precisamente, cúmprese o centenario da primeira vez que o himno, con música de Pascual Veiga, foi interpretado en público.