O retablo maior das Ánimas recupera a cor

Esta mañá, a partir das 11.30 horas, presentarase ao público a restauración do retablo maior da capela das Ánimas. O alcalde de Santiago, Xosé Sánchez Bugallo, e o xerente do Consorcio, Xosé Manuel Villanueva Prieto, asistirán a este acto.

A igrexa das Ánimas conta con nove retablos que representan a Paixón, Morte e Resurrección de Cristo. Creáronse a principios do século XIX: exactamente, entre os anos 1804 e 1814. O seu autor foi Manuel de Prado, irmán do arquitecto da igrexa das Ánimas, Melchor de Prado. E teñen a particularidade de que, para facelos, utilizou unha técnica típica de Italia, que nunca antes se utilizara en España.

Trátase dun método que foi moi empregado polos antigos romanos, e que se recuperou posteriormente no Renacemento e no Neoclasicismo. Consiste en crear escenografías no alto relevo de estuco de xeso aplicado sobre estruturas de ladrillo para policromalas.

Co paso do tempo, o efecto da humidade da igrexa das Ánimas e o fume das velas dos fieis quedaron totalmente deteriorados e de cor gris, polo que en 2007 activouse un plan global para devolverlles o seu esplendor. Hoxe preséntase a restauración do retablo maior, que representa a Crucifixión de Cristo. É o máis espectacular do conxunto polas súas dimensións (ten 14 metros de altura), e por ocupar o lugar central da igrexa. Os restauradores traballan nel desde o pasado mes de xullo. A responsable dos traballos, Ángeles Fernández, explicará neste acto todos os pasos que se deron. Acompañaraa unha representante de Alfagía, a empresa que dirixe os labores desta recuperación.

Este é o segundo retablo restaurado que se presenta en público. O primeiro foi o que mostra a escena da Cruz ao lombo, que se presentou o pasado mes de abril, durante a Semana Santa. Era o que estaba en peor estado, e os resultados sorprenderon a todos, xa que ademais da rehabilitación material das figuras recuperouse a súa policromía orixinal.