"Témoslle Lei"

O decano da Facultade de Dereito da USC, Luis Míguez, pola esquerda, participou na repartición do material FOTO: usc

A facultade de Dereito, unha das máis desgaleguizadas da Universidade de Santiago de Compostela xa que o curso pasado só se empregaba o galego no 11,8% das horas de docencia, acaba de comezar unha campaña para cambiar de tendencia. O obxectivo: que 30 de cada 100 horas de clases se impartan en galego.

Unha meta que a facultade de Dereito tentará alcanzar ao longo dos próximos tres cursos académicos a través da campaña Témoslle Lei, triplicando as actuais cifras de uso do galego. Segundo informan dende o centro, a campaña está dirixida "ao alumnado" co fin de "sensibilizalo a respecto da utilización da lingua galega no propio centro e no mundo profesional".

Ao longo de tres días, en quendas de mañá e tarde, alumnos de Dereito de diversas asociacións estudantís repartirán entre o estudantado do centro o material da campaña: unha bolsa co lema Témoslle Lei, dous folletos con argumentario e un CD coa escolma, en galego, das leis máis importantes que se estudan durante a carreira, así como recursos lingüísticos dos que podan botar man á hora de utilizaren o galego na súa vida académica.

A posta en escena da campaña realizouse por sorpresa onte na Facultade de Dereito, onde ademais da repartición de material, os universitarios tiñan á súa disposición un vídeo no que diversos profesionais do mundo do Dereito opinan sobre o uso da lingua neste ámbito. O fiscal xeral de Galicia, Carlos Varela; a maxistrada do Social en Santiago, Paz Filgueira; o xuíz da Fonsagrada, Luis Villares; o decano do Colexio de Avogados de Santiago, Evaristo Nogueira; o secretario do Concello de Outes, Xaquín Monteagudo; e os profesores da Facultade de Dereito José Antonio Gómez Segade e Antonia Nieto Alonso participan neste vídeo e animan ao PDI e ao alumnado do centro a incorporar a lingua galega no seu quefacer profesional.

De feito, o lema elixido Témoslle Lei fai referencia aos distintos significados desta expresión -gardar fidelidade, sentir simpatía ou terlle un grande aprezo- e incide no feito de que o galego conta con lexislación que o protexe e fomenta até lograr a igualdade real das dúas linguas cooficiais en todos os ámbitos e, asemade, na cuestión afectiva e identitaria cara ó idioma do país.

Témoslle Lei forma parte dun plan desta Facultade compostelá, aprobado en decembro de 2009, para aumentar e mellorar o uso do galego en Dereito en tres cursos académicos.