"Vermellas. Chamábanlles rojas" chega a Vigo

Mulleres no cárcere das Ventas (fondo Camilo de Dios) FOTO: AXENCIAS

A Casa das Artes de Vigo acolle ata o 20 de marzo a exposición VERMELLAS. Chamábanlles rojas, que pon nome e rostro ás mulleres represaliadas en Galicia tras o golpe de Estado de 1936.

Na mostra, organizada pola Vicerreitoría de Cultura da Universidade de Santiago de Compostela, achega a súa visión sobre as mulleres que padeceron esta represión un grupo de traballo formado por Claudio Rodríguez Fer, Carmen Blanco, Andrés Domínguez, Gustavo Hervella, Chus Martínez, Antonio Somoza e o Proxecto "As vítimas, as voces, os nomes e os lugares". Os investigadores deste equipo achegan os datos históricos á exposición; conclúen que foron 397 as galegas que sufriron humillacións

e vexacións, perderon seres queridos, cumpriron penas de cárcere ou foron asasinadas.

En diferentes paneis, pódense ver fotos das mulleres que padeceron o terror, un mapa dos lugares da represión da muller en Galicia -onde destacan polo seu número de represaliadas Coruña e Vigo e con maior represión, con resultado de morte, A Coruña, Vigo e Ferrol- ou proxéctase o vídeo da visita do presidente da República, Alcalá Zamora á Coruña en 1934 pertencente ó Fondo da familia Suárez Ferrín.

As mulleres foronsancionadas, enxuízadas, postas ante pelotóns de fusilamento, atopadas tiroteadas nas cunetas ou desaparecidas; outras rapadas e purgadas nun contexto de abusos e escarnio dos vencedores. Pero a exposición tamén mostra mulleres capaces de rebelarse contra a pretendida vergoña social, que mostran publicamente a súa cabeza pelada.

Inclúe documentación literaria, autoría de Claudio Rodríguez Fer e Carmen Blanco, e complétase ca música dun grupo de novos e novas intérpretes que colaboraron na gravación dun CD dedicado ás vítimas da represión franquista, e cuns gravados de Sara Lamas. A mostra foi inaugurada no 2009, e agora acóllea o Concello de Vigo con motivo do Día Internacional da Muller, o 8 de marzo.