Villares escolle Brasil como ponte para América

Convidado polo Ministerio das Relaçoes Exteriores do Brasil, Ramón Villares, presidente do Consello da Cultura galega, participou esta fin de semana na Conferência Internacional sobre o Futuro da Língua Portuguesa no Sistema Mundial, que se celebrou en Brasilia organizada pola Comunidade dos Países de Língua Portuguesa (CPLP).  

Villares aproveita a viaxe para abrir vías de colaboración con diferentes institucións. Deste xeito, reuniuse cos directores do Instituto Cervantes de São Paulo, Pedro Benítez, e co que Brasilia, Manuel Lombao. Neste último centro impartiu onte unha conferencia sobre o tema Galicia: unha cultura-ponte entre Europa e América.

En São Paulo, terá como obxectivos o establecemento de acordos de colaboración con diferentes institucións para promover e difundir a lingua e a cultura galegas no Brasil. Hoxe mesmo, Villares subscribirá un acordo marco co reitor da Universidade de São Paulo para a realización de actividades de intercambio cultural e pronunciará unha conferencia sobre Galicia: unha nación cultural, na Universidade de São Paulo.

Mañá será cando Villares se entreviste con Federico Barbosa, director de Poiesis, organización social de cultura, que administra o Museo de Língua Portuguesa -o máis visitado do Brasil- para concretar a súa posible colaboración nunha grande exposición sobre a lingua, literatura e cultura galegas.