Créditos lácteos

Non sei se Carme Freire, do Sindicato Labrego Galego, comparou as subvencións ó automóbil, por pór un exemplo, coas que a Consellería do Medio Rural debería artellar para os produtores de leite ou mesmo para os consumidores. Pero realmente soa razoable cando a escoitamos falar indignada fronte á proposta da Xunta de que os gandeiros continúen pedindo créditos sen garantías de que as súas producións vaian cotizar en positivo no mercado. A proposta, comercialmente falando, aínda que a Administración pague os xuros, resulta suicida, supoñendo, ademais, que os bancos accedan a facer efectivas as solicitudes duns gandeiros en proceso de ser insolventes. O SLG pide que a Xunta copie as medidas do Goberno de Asturias, no lugar de ignorar a realidade do sector e lanzarlle á opinión pública unha propaganda de confusión. Pero hai máis, o Goberno galego ten capacidade para actuar en tres frontes. Unha, controlar os prezos. Dúas, vixiar a circulación do leite importado. E tres, crear e poñer en marcha campañas que incentiven o consumo do leite galego e os seus derivados. Tamén debería primar a exportación, pero o que non debe facer a Xunta é a política da avestruz. xaperozo@yahoo.es