Falo do novo goberno...

Galego, enténdese. Síntoo por aqueles que esperaban unha morea de apupos, calugadas ou calquera outra sorte de asubíos pola remodelación que hai nadiña fixera o noso ZP. Vou pedirlle ao futuro presidente algunhas cousiñas en tres áreas: economía, ensino e cultura e medios de comunicación. Na economía, dende a miña ignorancia non disimulada, pídolle que facilite o máis posíbel o labor das pequenas e medianas empresas, o motor da nosa economía. Non é de recibo que haxa pequenos empresarios, algúns chámanse carrizos, que inda non cobraran facturas de hai catro ou cinco anos. Imaxino como viviriamos nosoutros sen o soldo varios meses. E facilitar a mobilidade laboral de empregados, que non o despedimento libre.

No ensino, por favor, que loite para conseguir as seguintes metas: a mellora dos recursos dos centros, unha verdadeira liberdade de elección na lingua, o desenvolvemento dun programa de acción, consensuado con todas as forzas políticas e sociais, que favoreza o estudo do galego coma unha lingua de todos e non como a imposición duns poucos que pensan que son a esencia da galeguidade, decepar a política dos colexios (certo que son uns poucos, pero hai cousas que arrepían), a loita contra a violencia nas aulas, a informatización, o afastamento do fracaso escolar, ese mal endémico da nosa comunidade educativa, unha certa estabilidade nos programas educativos? Na cultura, sentidiño. Curioso que quen puxo a primeira pedra do Gaiás (ese mastodonte de cuxo autor prefiro non lembrarme), sexa quen, ao mellor, poña a última. Gaiás aberto a todos, non a unha minoría afacendada que pague a morea de cartos que alí morreron. Inda soño cunha Galicia lifteada (perdón polo neoloxismo) nas súas igrexas, museos, casas natais de persoeiros, rúas, camiños? cos infinitos cartos que leva engulidos o monstro do Gaiás. Nos medios de comunicación, pídolle unha verdadeira liberdade e independencia. Xa sei, como di o meu respectado e admirado Piñeiro, que alí fala todo o mundo o que quere. Pero? ¿está toda Galicia representada neses faladoiros? Penso que non, que hai unha Galicia que non sae na TVG. Parece que hai medo a que alguén altere a homoxeneidade do politicamente correcto.

(Addenda: moitos pensarán que isto son trivialidades dun ignorante da realidade da nosa terra, pero son as ideas recollidas por min nunha xuntanza de galegos a pouco de se celebrar as eleccións. Nela había moitas caras escalouradas).