Financiamento indefinido

Pasaron á historia aquelas viaxes maratonianas nas que Fraga nunha mañá percorría todos os Ministerios de Madrid deixando papeis que ninguén lía. O presidente Alberto I semella máis pausado, pero dá a impresión de que vai coa mesma indefinición que levaba consigo o vello patrón. Feijóo toma o seu tempo, non ten présa por comezar a gobernar. Mentres o seus están afanados nunha profunda operación de derrubas do pasado, el escoita o presidente Zapatero e sae contento. Escoita o ministro Blanco e sae contento. Hoxe saberemos se logo de escoitar o vicepresidente Chaves tamén sairá contento e se mañá logo de departir coa ministra Salgado sairá co financiamento resolto. Polo momento non sabemos da súa postura, das cifras que poñerá enriba da mesa nin dos pasos que dará para reivindicar o 7,1% dos fondos estatais que nos corresponden ós galegos. Vai avalado pola confianza dos socialistas e nacionalistas, que non se fían da súa capacidade negociadora, pero déronlle unha marxe suficiente, impensable nas súas estratexias de oposición frontal. Do resultado destas negociacións vai depender moito, ademais do futuro económico inmediato de Galicia, a solvencia do Presidente.