Galego si, galego non

A polémica está servida. Uns a favor do galego, outros propoñendo un ensino máis castelanizado. E mentres as familias cubrindo unha enquisa que en moitos casos marcan ao chou, sen entender moi ben a súa repercusión, se é que a ten. Existe un conflito lingüístico entre o galego e o castelán? Mentres un sector da sociedade defende o inglés con fervor, o galego vaise murchando, meu pobre. Sabemos que ao longo da súa vida, o idioma pasou por momentos de debilidade, sendo necesario un tratamento especial para mantelo en pé. E hoxe, cando semellaba que gozaba dunha saúde aceptable, volve enfermar. De nada lle valen os que din defendelo usando só o castelán, malia a súa crenza de ter unha forte conciencia galleguista. Falándoo é como pode manter o seu status. A política lingüística da Xunta está a preocuparnos, alomenos aos que amamos o idioma. A derrogación do decreto que regula o uso desta lingua no ensino, e que provocará a segregación do alumnado en función da elección do idioma, fai doer a alma. Lembremos a propósito o poema de Celso Emilio Deitado frente ao mar, pertencente ao libro Longa noite de pedra. O poeta ourensán fala da lingoa proletaria do seu pobo e di que eu fáloa porque sí, porque me gosta,/ porque me peta e quero e dame a gaña;/ porque me sai de dentro, alá do fondo. Vai contra os pequenos mequetrefes que non teñen raíces e que non saben falar a fala nai. Reitero, con Celso Emilio, que eu tamén fáloa porque sí, porque me gosta/ e quero estar cos meus, coa xente miña,/ perto dos homes bós que sofren longo/ unha historia contada en outra lingoa.

En oposición ao PP, o PSOE compara a polémica que xurdiu arredor do galego coas teorías da evolución das especies de Darwin, alegando que os pais non teñen dereito a decidir, pois? acaso teñen parte á hora de decidir os currículos impartidos nos centros educativos? O sector da poboación aparecido baixo a etiqueta de Galicia Bilingüe ve o asunto doutro xeito, e así convocou recentemente unha manifestación en Compostela para reclamar a liberdade de elección, lonxe do que chaman imposición e co gallo de recuperar o bilingüismo tan atractivo que había, segundo manifestou a asociación. Para eles a sociedade está sometida á imposición do galego na educación, na Administración e ata na sanidade e din que as linguas non teñen os dereitos, que os teñen as persoas. Pero o certo é que só se está a consultar a unha das partes implicadas no proceso.