Prudencia Almunia

O comisario de Asuntos Económicos, Joaquín Almunia, chega a Madrid en plan prudente e afirma que aínda que "xa non estamos en caída libre", imos seguir purgando nos próximos meses. Así que Almunia recomenda "non descartar novos estímulos fiscais a futuro". A iso chámao "prudencia". ¿E que pasa co Pacto de Estabilidade? Segundo Almunia non é necesario regresar ó Pacto de Estabilidade "porque nunca saímos del". En opinión do Comisario de Economía, Bruxelas aplicou a flexibilidade acordada en 2005. "O flexible, é útil e estase aplicando; vai saír vivo e coleando da crise", conclúe. Aceptamos polbo. O mesmo se pode dicir da actuación da Comisión Europea de Competencia. O presidente da CECA, Juan Ramón Quintás, acusa á comisaria Nelie Kroes de non estar aplicando a normativa comunitaria que impide as axudas de Estado. Desde a AEB advírtese do proteccionismo e neonacionalismo no mercado financeiro europeo. E de remate, a vicepresidenta Salgado xustifica o Frob na "fiestra de oportunidade" que supón que a Comisión relaxe os criterios de concesión de axudas de Estado compatibles coa lexislación comunitaria.

¿Que opina Almunia? O de sempre: o comisario non se molla. Por unha banda, asegura que "non hai barra libre" e que a lexislación comunitaria sobre axudas de Estado "non se puxo entre paréntese". Con todo, tamén sinala que a aplicación non pode ser a mesma en momentos de crises que en tempos de normalidade. En conclusión: a normativa está entre paréntese aínda que a Comisión emite os seus ditames para disimular.

Máis. Almunia lánzalle unha mensaxe clara ó BCE. No que cualifica de "estratexia de regreso" considera que os estímulos fiscais deben desaparecer antes que a marcha atrás da política monetaria expansiva. Ou dito doutro xeito: suxire que o BCE debe seguir mantendo as comportas abertas ata que os gobernos decidan regresar ó equilibrio orzamentario. Pola contra, Trichet considera que non hai marxe para estímulos fiscais adicionais e lanza un rumbo máis ben alcista da política monetaria. Un claro choque de trens no que Almunia prefire non entrar. "Cada vez que o presidente do BCE, Jean Claude Trichet, explica as súas decisións, é perfectamente claro", di Almunia. Pelexas, as xustas.