Hemeroteca web | RSS  RSS     Mércores 13.12.2017 Actualizado 17:49
El Correo Gallego Radio Obradoiro CorreoTV Anova multiconsulting

Galicia Hoxe

Opinión

caderno aberto

MIGUEL ANXO FERNÁN VELLO

Santiago de Compostela, capital literaria

20.12.2006 
A- A+

Santiago de Compostela, capital literaria por excelencia e cidade declarada pola Unesco “Patrimonio da Humanidade”, volveu a se converter por obra e graza do Pen Clube de Galicia en centro literario internacional de amplo espectro e alta representación. E hai que recoñecer aquí, unha vez máis, a gran capacidade de organización do Pen Clube galego, que a través do I Encontro Internacional de Escritores ‘De pedra e de palabra: Europa e Iberoamérica’ soubo concentrar en Santiago a máis de 50 autores galegos, europeos e iberoamericanos nun proxecto que ten como meta inmediata sinalar e celebrar a capital de Galicia como unha das cidades literarias do mundo. Estiveron entre nós Nélida Piñón, Antonio Skármeta, José Emilio Pacheco, Lasse Söderberg, Ana María Matute e René Arrieta, entre outros, xunto a grandes poetas e escritores galegos como Arcadio López-Casanova, Manuel Rivas, Xavier Seoane, Alfredo Conde e Xosé Luís Méndez Ferrín; e eu ben que sentín non poder saudar e abrazar a amigos como David Castillo, Juan Carlos Mestre, Alfredo Pérez Alencart, o hispanista e poeta sueco Lasse Söderberg e, como non, a Filipa Leal, espléndida voz persoal e poética portuguesa que eu lembro ben lembrada nun Festival de Poesía de Aveiro. Dixo Luís González Tosar, con acerto, que o primeiro e principal obxectivo deste Encontro compostelán se centraba en intentar que a nosa literatura transcenda cara a fóra, e isto a través do diálogo. Diálogo tanto no plano humano como no plano literario. Fusión de ambos. Santiago de Compostela –un leva anos afirmando isto– está chamada a se converter nunha gran capital iberoamericana e europea da cultura. Galicia, e en particular Santiago (o noso nome máis internacional) –e isto tamén é unha teima de Auliga (Amigos da Universidade Libre Iberoamericana en Galicia)–, ten que actuar como “ponte” entre España, Europa e América. O noso país ten que ser vangarda cultural e literaria nese gran diálogo aínda por establecer. Beizóns ao Pen Clube por tirar nesa dirección. Sigamos.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS