Touriño: “Galiza non se Vende xera inmobilismo”

O ex presidente da Xunta Emilio Pérez Touriño criticou onte o pensamento de esquerdas que se sitúa "en posicións defensivas" e que corre "o risco" de xerar "inmobilismo", exemplificando coa postura que adoptou a plataforma Galiza non se vende fronte á norma de protección da costa impulsada na pasada lexislatura. Touriño manifestouse así na inauguración do Curso de Pensamento Carlos Gurméndez, organizado pola Universidade da Coruña e o Club de Prensa de Ferrol e que se celebra ata mañá en Pontedeume, baixo o título Pensando na sociedade de valores. O ex presidente defendeu o relatorio "Despois do poder político, ¿hai espazo para a utopía?".

No actual "cambio de época" no que situou a sociedade, criticou que a defensa da utopía poida levar á esquerda a "posicións defensivas" que sostén que "ocultan o descompromiso e a falta de capacidade coa procura de resposta" para o "progreso dos valores". Así, puxo o exemplo concreto da normativa de protección da costa que defendeu o Goberno bipartito e que prohibía "preventivamente" a construción a 500 metros da costa. Lamentou que, ademais das "resistencias internas" do seu partido polo "temor a perder as eleccións e non ser entendidos", xurdisen plataformas de esquerdas que rexeitaron a normativa. "É curioso que fronte ó Goberno que estaba aprobando a norma de maior transcendencia na historia da comunidade, organizouse unha plataforma que se chamou Galiza non se vende", manifestou. Touriño engadiu que, "pasado o tempo, felizmente se converteu nunha plataforma común que a todo o mundo lle custa cambiar e que o Goberno do PP a asume como propia".

Na súa conferencia, Touriño declarouse un "cidadán activo", logo de abandonar as súas responsabilidades políticas tras a perda da presidencia da Xunta e o seu abandono do PSdeG. Asegurou que resulta "especialmente grato" recuperar a súa vida e a docencia académica e participar "no ágora pública da democracia" desde a perspectiva dun cidadán.

O Curso Carlos Gurméndez conta con case 70 participantes. Durante os tres días que dura o seminario, o programa inclúe conferencias sobre a voz das mulleres en Europa, a cargo da parlamentaria europea Inés Ayala Sénder; a nova ética militar no século XXI, do almirante da Armada Miguel Fernández e Fernández, e a islamofobia europea, a cargo do catedrático de Teoloxía da Universidade Carlos III, Juan José Tamayo.

Comparte en