O programa oculto da dereita

Vai resultar que o Goberno PSOE de Rodríguez Zapatero leva a cabo políticas de dereita, aplicando como aplica, sen enrubescer en ningún momento, políticas económicas neoliberais; e, como di o economista Alberto Garzón Espinosa, os socialistas españois están renunciando a unha saída progresista da crise e están apostando por unha saída regresiva que, en teoría, se corresponde fundamentalmente co eixo ideolóxico do Partido Popular. E así mesmo é. O PSOE de Rodríguez Zapatero -cadáver político agora mesmo, despois das pasadas eleccións, en estado puro- fai política de dereitas, e a dereita política representada polo PP, moi satisfeita no fondo, observa o fiasco, contempla a caída electoral socialista, gaña milleiros de votos (tampouco foron tantos) e agarda pacientemente -razón estoica: impasibilidade e imperturbabilidade-, porque, de seguirmos así, axiña chegará ao poder. ¿Mais cal é, con todo, se é que existe, o programa político propio da dereita española? ¿Será moi distinto do que xa aplica, tan dereitosamente, o actual Goberno do PSOE? Vexamos. Esperanza Aguirre, por exemplo, outravolta presidenta da Comunidade Autónoma de Madrid, presentou un programa electoral contido en 48 páxinas con moitas fotografías, entre elas 30 imaxes persoais da candidata, e un, lendo tal tocho exhibicionista, só chega a albiscar que o programa consiste en aplicar recortes e promocionar a austeridade. ¿E que hai das privatizacións, señora? ¿E da fiscalidade para os ricos, e da vivenda, e das actuacións sociais, e das infraestruturas...? Rien de rien. E un chega á conclusión de que a dereita política española ten un programa oculto, coincidente en moitos dos seus puntos co que está a levar a cabo, tan dilixente el, José Luis Rodríguez Zapatero. Díxoo con admirábel claridade Gaspar Llamazares: "O programa explícito do PSOE é o programa oculto do PP". E isto xa o dicía no ano 2010, engadindo algo que agora se cumpriu: "A política neoliberal de axuste duro que aplica o PSOE pode levalo á ruína". E así foi..