Os sete magníficos

O mandato de Senén Barro chega ó seu final e será lembrado por moitas cousas positivas pero seguramente a máis significativa sexa o impulso de modernización que significa a consecución do campus de excelencia, o Campus Vida, para a USC nestes momentos de crise e tribulacións. Deixa sobre a mesa un reto que o seu herdeiro ou herdeira deberá administrar para non defraudar as expectativas espertadas en Compostela, en particular, e en Galicia en xeral. Na campaña electoral que a USC viviu estes días o proxecto de Senén Barro tivo un protagonismo discreto cando debeu ser un piar esencial para definir a xestión do futuro, do mesmo xeito que a defensa da Facultade de Medicina, íntegra e única en Santiago, debeu manifestarse como un dereito irrenunciable por parte das tres candidatas e os catro candidatos.

En ambas as dúas cuestións existiu certa morneza nunha campaña electoral sen precedentes, dun calado mediático espectacular, na que hoxe compiten sete magníficos/as e dos que só dous pasarán á gran final. Probablemente tantas candidaturas non deixaron ver a árbore dos programas reais, pero en Compostela agárdase que, nos próximos días, os dous finalistas expoñan claramente como administrarán a herdade do Campus Vida e a defensa de Medicina.