EUROPA PRESS. MADRID
O Ministerio de Fomento e a Xunta fixaron hoxe o novo escenario de execución do AVE a Galicia, que contempla a posta en servizo de distintos tramos deste corredor a partir de finais de 2011 co obxectivo de que estea ó completo no horizonte do 2015, segundo anunciou o ministro de Fomento, José Blanco.
Para iso, anunciaron licitacións e adxudicacións desta infraestrutura por importe total de 4.678 millóns de euros entre 2009 e 2010, o cal, segundo afirmou Blanco, constitúe "o maior impulso dado a un AVE en España en tan pouco espazo de tempo".
Ademais, e co fin de que Galicia empece a gozar dende o 2012 dos beneficios da Alta Velocidade, Fomento encargaralle a Renfe novos trens AVE, fabricados a partir dun prototipo deseñado por Talgo que permite circular a Alta Velocidade por vías de ancho convencional e sen electrificar.
Segundo o Ministerio, a posta en marcha destes trens permitirá recortar en tres horas o actual tempo de viaxe en tren entre Madrid e A Coruña. Blanco realizou este anuncio nunha comparecencia conxunta co presidente da Xunta, Alberto Núñez Feijóo, tras a reunión que ambos os dous mantiveron esta tarde en Madrid.
RSS
