Pose sae elixido cun 83,2% dos votos e promete ser "o número un en traballo e ilusión"

Modesto Pose resultou elixido hoxe secretario provincial do PSdeG en Pontevedra cun 83,2 por cento dos delegados, algo polo que asegurou estar "eternamente agradecido". Por iso, prometeu ser "o número un en traballar e en ilusión", co obxectivo de vencer ao PP nas próximas eleccións municipais.

Despois de que a presidenta da Mesa do Congreso, Paula Fernández Pena (alcaldesa de Silleda), apuntase que a candidatura de Pose recibiu 109 votos a favor e 22 en branco, o novo líder provincial sinalou que o PSdeG "sabe cando discutir e debater e cando debe sumar e poñer todas as enerxías na mesma dirección". "E cando as pon, é imparable", evidenciou.

Tras agradecer a súa elección, Modesto Pose insistiu en que "o próximo reto" son as eleccións municipais de 2011 e asegurou que "traballará duro nelas". "Vaise decatar do que é un partido en pleno funcionamento", advertiu, tras indicar que o seu obxectivo é "traballar para gañar a partida ao PP".