Hemeroteca web
|
RSS
Luns 21.05.2012
| Actualizado 10.14
 |
| Juan Casares Long, novo reitor da USC, compareceu onte á mañá perante os medios de comunicación para valorar os resultados FOTO: RAMÓN ESCUREDO |
O reitor electo da Universidade de Santiago (USC), Juan Casares Long recalcou que fará "un cambio de época" baseado no lema da súa campaña: "Contando con todos" porque "todo o mundo ten que ser escoitado e poder dar a súa opinión" e porque a USC "necesita un Reitorado forte" nestes momentos" nos que, dixo, hai a "necesidade de arrimar o ombro".
Así, apostou por manterse na "cultura do esforzo" e comentou que xa comezou a traballar. De feito, onte pola mañá mantivo unha reunión co actual reitor na que falaron do "camiño para seguir a facer a transición o máis sinxela e positiva" entre os dous equipos.
Deste modo, comentou que no primeiro encontro co reitor saínte abordaron aspectos de "loxística" e afirmou que traballan para que "antes do final da semana ou principios da próxima" poden afondar na transición.
Sobre a data da toma de posesión, Casares Long estimou que terá lugar "no prazo aproximado dun mes", en función dos trámites, xa que os resultados teñen que pasar de provisionais a definitivos; aprobalo o consello da Xunta e fixar unha data co máximo mandatario galego, Alberto Núñez Feijóo, para o acto.
Análise dos resultados electorais
Tras alcanzar o 56,91% dos votos fronte ao 43,09% de Lourenzo Fernández Prieto, Casares cualificou de "clave" da vitoria "a confianza do profesorado tanto no campus de Lugo coma de Santiago", con 708 votos recibidos fronte aos 369 do outro candidato.
Con todo, recoñeceu que en canto ao Persoal de Administración e Servizos (PAS) recibiu 355 papeletas fronte ás 408 de Fernández Prieto. "Co 46,5% temos un apoio importante do sector", sostivo, non obstante, para destacar que o seu equipo traballará para "convencer a todos os membros do PAS".
Nesta liña manifestouse en relación cos estudantes, dos que obtivo uns 200 votos menos có seu rival, pero resaltou que conta "cun amplo apoio", un 45%. "Queda moito traballo para motivalos e incentivar a súa participación", aseverou.
Medicina: non á duplicidade
Casares confía en chegar a un acordo entre a Xunta e as tres universidades sobre a docencia clínica de Medicina. "Estou seguro de que si. En educación non pode haber vencedores nin vencidos, o resultado ten que ser bo para Galicia", di, e desbota unha segunda facultade, que "nunca foi máis ca un soño pouco realista dalgúns. Se falamos de diferenciarnos,non podemos caer outra vez nos mesmos erros do pasado".
Austeridade cara á sociedade
"A USC ten que demostrarlle á sociedade que é rigorosa no control de ingresos e gastos. Imos facer fincapé niso", teima Casares ó preguntarlle sobre a postura de austeridade coa que a USC pode demandar máis implicación económica da administración. Pero refuga manifestar se apertará máis o cinto. "Descoñezo as previsións. Insisto, hai que empezar a ver que o investimento na universidade non é un gasto, senón aposta de futuro".
